პროტესტია ბოლნისში — დარბაზის ხეობის ექვსი სოფლის მოსახლეობა კომპანია „არემჯის“ მიერ დაწყებულ სამუშაოებს ეწინააღმდეგება და მძიმე ტექნიკის დაუყოვნებლივ გაჩერებას ითხოვს. ადგილობრივები აცხადებენ, რომ ტერიტორიაზე ოქროს მოპოვებისთვის მიმდინარე სამუშაოები გარემოს სერიოზულ ზიანს აყენებს.
მოსახლეობის თქმით, უკვე თვეზე მეტია, რაც მთის ფერდობებზე მძიმე ტექნიკა მუშაობს და მასობრივად იჭრება ტყე. სოფლების მცხოვრებლები ამბობენ, რომ პროექტის დაწყებამდე მათთან არანაირი კონსულტაცია არ გამართულა და გადაწყვეტილება მოსახლეობის მონაწილეობის გარეშე მიიღეს.
ადგილობრივები აცხადებენ, რომ ტყე და იალაღები მათთვის სასიცოცხლოდ მნიშვნელოვანი რესურსია. მათი თქმით, მოსახლეობას შეშის მოჭრაზეც კი მკაცრი შეზღუდვები აქვს დაწესებული, მაშინ როცა კომპანია მრავალწლოვან ხეებს უპრობლემოდ ანადგურებს.
პროტესტის მონაწილეები შესაბამის უწყებებს მოუწოდებენ, შეისწავლონ მიმდინარე სამუშაოების კანონიერება და გარემოზე შესაძლო ზემოქმედება, ვიდრე ტერიტორიაზე სამუშაოები გაგრძელდება.
“ეს არის ხეობა გეოგრაფიულად, სადაც საკმაოდ ბევრი გამოწვევებია ისედაც და ამ ბევრი გამოწვევის სივრცეში ახალი ინფრასტრუქტურის გახსნა, კარიერის მოწყობა, მომპოვებლური საქმიანობის დაწყება არის საკმაოდ ძალიან დიდი საფრთხე. ეს ეკოსისტემა დაზიანებულია ამ 15 წლიანი მუშაობის განმავლობაში, საყდრისი, ბნელი ხედი გარემო. ადამიანები ამას გრძნობენ თავის ცხოვრებაზე ყოველდღიურობაში – მოსავლიანობა შემცირეულია, საძოვარი მიწების რაოდენობა შემცირებულია, ფერმერები საკმადო დიდი წნეხის ქვეშ არიან”, – ამბობს ადგილობრივი.