“გელა ხასაიამ ჩადენილი დანაშაული სრულად აღიარა – მასთან საპროცესო შეთანხმება გაფორმდა” – პროკურატურა

გელა ხასაიამ ჩადენილი დანაშაული სრულად აღიარა – მასთან საპროცესო შეთანხმება გაფორმდა, – ამის შესახებ „ინტერპრესნიუსს“ პროკურატურაში განუცხადეს.

უწყების განმარტებით, საპროცესო შეთანხმება გაფორმდა ხასაიასთან ერთად დაკავებულ ვასილ ქერდიყოშვილთანაც.

„სისხლის სამართლის საქმეზე დამტკიცდა ვასილ ქერდიყოშვილთან და გელა ხასაიასთან დადებული საპროცესო შეთანხმება. ორივე მათგანს მიესაჯა 4 წ თ/ა, საიდანაც 1 წელს მოიხდიან პენიტენციურ დაწესებულებაში, 3 წელი ჩაეთვლებათ პირობით, ამავე გამოსაცდელი ვადით. ორივე ბრალდებულმა სრულად აღიარა ჩადენილი დანაშაული“,- აცხადებენ უწყებაში.

ცნობისთვის, პროკურატურა გელა ხასაიას ედავებოდა, რომ მან 1-ელ სექტემბერს, თბილისში, თამარ მეფის გამზირის მიმდებარე ტერიტორიაზე ვასილ ქერდიყოშვილთან ერთად, ჯგუფურად ჯანმრთელობის განზრახ დაზიანება მიაყენა დაზარალებულს – რამაზ ჩადუნელს. სამართალდამცველებმა ბრალდებულები 29 სექტემბერს დააკავეს. მათ ბრალდება საქართველოს სისხლის სამართლის კოდექსის 118-ე მუხლის მეორე ნაწილით (ჯანმრთელობის განზრახ ნაკლებად მძიმე დაზიანება, ჩადენილი ჯგუფურად) წარედგინა, რაც სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.