“სტრარეგია აღმაშენებლის“ ლიდერი, გიორგი ვაშაძე ქვეყანში შექმნილი მძიმე მდგომარეობიდან გამოსავალს ერთად დგომაში ხედავს და საზოგადოებას 26 მაისს შეკრებისკენ მოუწოდებს.
როგორც ის ამბობს, არ ქმნის ცრუ ილუზიებს, რომ “რეჟიმი 26 მაისს დასრულდება, თუმცა ერთად დგომას და ქუჩაში გამოსვლას უზარმაზარი რამ შეუძლია.“
ყველას მინდა ვუთხრა, თუ ერთად არ დავდეგით, გათითოკაცებულს წაგვაქცევს ეს რეჟიმი. 26 მაისი არის ჩემთვის ერთად დგომის დღე. არ ვქმნი ცრუ მოლოდინს, რომ 26 მაისს დამთავრდება ეს რეჟიმი, მაგრამ ჩვენს ერთად დგომას, ბევრი ხალხის ქუჩაში გამოსვლას, უზარმაზარი რამე შეუძლია. ხალხნო, სახლში რა გაჩერებთ. როგორ ვუყურებთ ახლა, როგორ წაგართვა რეგიონის ლიდერის სტატუსი სომხეთმა? ტაშს ვუკრავთ ამას? მსოფლიო ლიდერები სომხეთში ჩასულები, გეგმავენ მომდევნო წელს ბაქოში წასვლას, შენი ქვეყნის წარმომადგენელი კი დგას გვერდზე გაწეული, უხერხული ადამიანივით, ხელსაც ვერ ართმევს ნორმალურად, – ამბობს ვაშაძე.
მისი თქმით, მმართველი გუნდი ტყუილად ეძებს კრიზისის გასაღებს ქვეყნის გარეთ, საქართველოს ბედი არა ბრიუსელში, არამედ საქართველოში წყდება.
ძალიამ მკაფიოდ მინდა ვუთხრა ამ ადამიანებს, არ გამოგივათ, ბრიუსელში საქართველოს ბედი არ გადაწყდება, საქართველოს ბედი წყდება საქართველოში. მანამ სანამ, ამდენი პატიმარია, სანამ ადამიანებს არ აქვთ ნორმალური ცხოვრების საშუალება, სანამ საზოგადოება ხელოვნურად არის გახლეჩილი მათი მხრიდან, ეს ვერ მოხდება. ტყუილად ეძებენ კრიზისის გასაღებს ქვეყნის გარეთ, კრიზისის გასაღები ქვეყნის შიგნითაა. თუ გსურს რაიმე ნაბიჯის გადადგმა, ჯერ შენ ხალხს უნდა დაელაპარაკო, პოლიტპატიმრები და სინდისის პატიმრები გაათავისუფლო, ანტიდემოკრატიული კანონები უკან უნდა წაიღო, რეპრესიული წნეხი უნდა მოხსნა და ახალი, ნორმალური არჩევნები უნდა ჩაატარონ, – განაცხადა ვაშაძემ.
ოპოზიციონერი ლიდერი დარწმუნებულია, რომ გამარჯვება აუცილებლად მოვა.
მე მჯერა, რომ გავიმარჯვებთ, ოპტიმისტურად ვუყურებ ამ სურათს. ვხედავ, როგორ კომპრომისებზე ნაბიჯ-ნაბიჯ უწევს წასვლა რაღაცებზე „ოცნებას“, მაგრამ ეს საკმარისი არ არის. ვერ დაალაგებთ ამ ურთიერთობას. ვაშინგტონში და ბრიუსელში ნუ ეძებთ გასაღებს, გასაღები ქართულ საზოგადოებაშია. ჩემთვის 26 მაისი პირველი ნაბიჯია. ყველა ერთად უნდა დავდგეთ და ვთქვათ, რომ ერთად ვდგავართ. ჩემთვის 26 მაისი ეს არის დავინახო მაძლევს თუ არა მანდატს ქართული საზოგადოება, რომ ბრძოლა გადავიტანო უფრო ახალ ეტაპზე. ერთი პარტია გვაქვს, ერთი სამშობლო გვაქვს და ერთად უნდა დავდგეთ -თქვა მან.