დაავადებათა კონტროლის ეროვნული ცენტრის ხელმძღვანელს ამირან გემყრელიძეს დიდი იმედი აქვს, რომ ინფექციის ზრდა ორი თვის განმავლობაში თანდათან შემცირდება. მისი თქმით, ქვეყანაში ტექნოლოგიები განვითარდა და სამედიცინო ქსელი უფრო მეტად არის მომზადებული. მან კიდევ ერთხელ განმარტა, რომ 80%-ში დაავადება მსუბუქად მიმდინარეობს, 15%-ში – მწვავედ, 5%-ში – კრიტიკულად.
„ძალიან დიდი იმედი მაქვს, რომ ინფექციის ზრდა ორი თვის განმავლობაში თანდათან შემცირდება. დღეს, ჩვენი ქვეყანა უფრო მეტად არის მომზადებული მსგავს ინფექციებთან საბრძოლველად, ვიდრე ეს 5, 10, 15, 20 წლის წინ იყო“, – განაცხადა გემყრელიძემ „იმედის კვირის“ ეთერში.
ბოლო მონაცემებით, ინფექციური საავადმყოფოს ბოქსირებულ განყოფილებაში სულ 19 პაციენტია მოთავსებული. კლინიკაში მხოლოდ საქართველოს მოქალაქეები რჩებიან. მათი ნაწილი ირანიდანაა ჩამოსული, ნაწილი კი იტალიიდან.
საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.