მოკლული მასწავლებლის, გიგა ავალიანის დედამ თბილისის საქალაქო სასამართლოსთან განცხადება გააკეთა:
“მას შემდეგ, რაც მოხდა მოწმის იდენტიფიცირება, მას შემდეგ, რაც მოწმემ დადო ფიცი, უდავოდ გამოაცხადეს ადვოკატებმა მისი ჩვენება და ცირკი დამიდგა უცხო მამრებმა, ყველაფერს გეტყვით დეტალებით, მაგრამ მე მინდა ვთქვა ის, რომ აქ იბრძვის ეკა კუპატაძე, ღირსეული, უდანაშაულო ბიჭის, გიგა ავალიანის დედა. მე ვერავინ ვერ მომერევა. მით უფრო მაშინ, როცა მე ზურგს მიმაგრებთ თქვენ და ზურგს მიმაგრებს სახელმწიფო. დიახ, ქალბატონი ქეთი სონიძე დღეს იყო პრინციპული და ჩვენ ვერ მოგვერევიან მკვლელები. არ მისცეთ გოგოებო და ბიჭებო არავის უფლება, რომ ჩვენი მომავალი მოკლან ამ ველურმა მამრებმა” – თქვა მოკლული მასწავლებლის, გიგა ავალიანის დედამ თბილისის საქალაქო სასამართლოსთან მას შემდეგ, რაც ნია იმნაძე პროცესზე შეუძლოდ გახდა და ის სასწრაფო დახმარების ეკიპაჟმა გადაიყვანა.
ეკა კუპატაძემ რამდენიმე დღის წინ სოციალურ ქსელში დაწერა, რომ იმნაძის ადვოკატი ცდილობდა, ჯანმრთელობის მდგომარეობის გამო პროცესზე მისვლა თავიდან აერიდებინა. თუმცა, მოგვიანებით მანვე გაავრცელა ინფორმაცია, რომ სასამართლომ პროკურორის შუამდგომლობა დააკმაყოფილა და ნია იმნაძე გამოიკითხებოდა.
ახალგაზრდა მასწავლებელი, გიგა ავალიანი, რომელსაც 1 ოქტომბერს სახლთან ჩაუსაფრდნენ და სცემეს, 25 ოქტომბერს კლინიკაში გარდაიცვალა. 26 წლის მასწავლებელს თავის არეში უმძიმესი დაზიანებები მიაყენეს, მას ორი ოპერაცია ჩაუტარდა, თუმცა ექიმებმა მისი გადარჩენა ვერ შეძლეს.
გიგა ავალიანის საქმეზე ალექსანდრე გაბაშვილსა და გიორგი რიკაძეს 14-14 წლით, დემეტრე ჩიქოვანს კი 9 წლით თავისუფლების აღკვეთა მიესაჯათ. არასრულწლოვანთა მართლმსაჯულების კოდექსის თანახმად, მსჯავრდებულებს სასჯელი 1/4-ით შეუმცირდათ, შესაბამისად, გაბაშვილი და რიკაძე პენიტენციურ დაწესებულებაში 10 წელსა 6 თვეს მოიხდიან, დემეტრე ჩიქოვანი კი 6 წელსა და 9 თვეს.