კულტურის სამინისტრო 26 მაისთან დაკავშირებით ბილბორდების განთავსებისთვის ფხაკაძეების სარეკლამო კომპანია ალმას 440 ათას ლარს გადაუხდის – ინფორმაციას BMG ავრცელებს და წერს, რომ თანხას კომპანია ალმა ტექსტური და ვიზუალური მასალის დამზადებისა და განთავსებისთვის მიიღებს. გამარტივებული შესყიდვის მოთხოვნით სამინისტრომ შესყიდვების სააგენტოს უკვე მიმართა.
“დამოუკიდებლობის დღის – 26 მაისისადმი მიძღვნილი ღონისძიებების ორგანიზების სამოქმედო გეგმის დამტკიცების შესახებ“ საქართველოს მთავრობის 2026 წლის 25 მარტის განკარგულების შესაბამისად, განისაზღვრა საქართველოს დამოუკიდებლობის დღის – 26 მაისისადმი მიძღვნილი ღონისძიებების ორგანიზების სამოქმედო გეგმა. აღნიშნული გეგმის მიხედვით, კულტურის სამინისტროს დაევალა, მათ შორის, შემდეგი ღონისძიებების ორგანიზება: ადმინისტრაციულ შენობებზე ბანერებისა და კონსტრუქციების დამზადება − მონტაჟი/დემონტაჟი.
26 წლის მაისის ღონისძიებების აღნიშვნისათვის დაგეგმილია მასშტაბური ღონისძიებები. ღონისძიებების შესახებ საზოგადოების ინფორმირების, ინფორმაციის ხელმისაწვდომობის გაზრდისათვის მნიშვნელოვანია საინფორმაციო ხასიათის სარეკლამო მასალის (ბილბორდები, ლაითბოქსები, მონიტორებზე ინფორმაციის განთავსება) დამზადება და დამონტაჟება თბილისსა და საქართველოს სხვადასხვა ქალაქში” – წერია დოკუმენტში.
გამოცემის ცნობით, კულტურის სამინისტრო ხელშეკრულებას კომპანია “ალმას” უფორმებს, რადგან ბანერების განთავსებაზე ქვეყნის დიდ ქალაქებში ექსკლუზიური უფლება მხოლოდ მას აქვს.
“შესყიდვის ობიექტის დანაწევრება შეუძლებელია, რადგან შპს “ალმა” სარგებლობს სარეკლამო და საინფორმაციო მასალების განთავსების ექსკლუზიური უფლებით რეკლამის განთავსების ადგილებში. შესაბამისად, აღნიშნული მომსახურების შესყიდვა უნდა განხორციელდეს შპს “ალმასგან” – აღნიშნულია დოკუმენტში.
სარეკლამო მასალების მონტაჟი/განთავსება 13 მაისიდან 26 მაისის ჩათვლით უნდა მოხდეს.