დიუშენის კუნთოვანი დისტროფიით დაავადებული ბავშვების მშობლებმა მთავრობის კანცელარიასთან კიდევ ერთი ღამე გაათენეს.
მშობლები მიხეილ სარჯველაძის მ. იაშვილის სახელობის ბავშვთა ცენტრალურ საავადმყოფოში ვიზიტს გამოეხმაურნენ.
აღნიშნული კლინიკა იშვიათი დაავადებების სამკურნალო სახელმწიფო პროგრამის ახალ კომპონენტში სერვისის მიმწოდებლად ჩართვის მსურველია.
მშობლების თქმით, მნიშვნელოვანია, რომ სამინისტრომ დაიწყოს ზრუნვა მულტიდისციპლინური გუნდის შექმნაზე, თუმცა ისინი ბრძოლას არ შეწყვეტენ, სანამ სახელმწიფო ქვეყანაში აუცილებელ მედიკამენტებს არ შემოიტანს.
“აქ 24 საათი ყოფნა გაგრძელდება, სანამ ყველა მოთხოვნა არ დაკმაყოფილდება და მთავარი მოთხოვნა მაინც მედიკამენტებია. ძალიან მნიშვნელოვანია, რომ სამინისტრომ დაიწყოს ზრუნვა მულტიდისციპლინური გუნდის შექმნაზე, უკვე სათანადო კლინიკებიც, თუ კლინიკა შეარჩია, ეს არის ერთი მნიშვნელოვანი გამარჯვება. მშობლებს სხვა ალტერნატივა არ გვაქვს, გარდა იმისა, რომ საზოგადოების მხარდაჭერით გავაკეთოთ ყველაფერი, რომ სახელმწიფომ ეს მედიკამენტები საქართველოში შემოიტანოს და ჩვენმა შვილებმა მიიღონ აუცილებელი მედიკამენტები ამ დაავადების შესაჩერებლად,” – განაცხადა კახა წიქარიშვილმა.
ცნობისთვის, გუშინ, დიუშენის კუნთოვანი დისტროფიით დაავადებულ ბავშვებს, მათ მშობლებს და მხარდამჭერებს შსს-მ ბიძინა ივანიშვილის რეზიდენციასთან აქციის გამართვის უფლება არ მისცა.
მოგვიანებით, მათ საპატრიარქოსთან გადაინაცვლეს, სადაც პოლიცია დახვდათ მობილიზებული, ხოლო საპატრიარქოსგან მიიღეს პასუხი, რომ დღეს, 7 მაისს, ცხელ ხაზზე დაერეკათ.