განათლების სამინისტროს შპს “საგანმანათლებლო რესურსებში” სასკოლო ფორმების რეალიზაციასთან დაკავშირებულ დეტალებს განმარტავენ.
როგორც ისინი აღნიშნავენ, გამარჯვებულ კომპანიასა და შპს “საგანმანათლებლო რესურსებს” შორის გაფორმდება ხელშეკრულება, რის საფუძველზეც “საგანმანათლებლო რესურსები“ შეისყიდის ფორმებს და შემდეგ მოახდენს მის რეალიზაციას.
მათივე ინფორმაციით, ფორმის დაზიანების შემთხვევაში მშობელს სწორედ “საგანმანათლებლო რესურსებიდან“ ექნება ახლის შეძენის შესაძლებლობა.
„დეტალები გამარტივებული შესყიდვის დასრულების შემდეგ გახდება ცნობილი. ეს დადგენილი პროცედურების გავლით გამოცხადებიდან 3 კვირამდე ვადაში მოხდება. გამარჯვებულ კომპანიასა და შპს “საგანმანათლებლო რესურსებს” შორის გაფორმდება ხელშეკრულება, რის საფუძველზეც მათგან შევისყიდით ფორმებს და შემდეგ მოვახდენთ მის რეალიზაციას. სოციალურად დაუცველებისთვის, ვისაც 60 000-ზე ქვემოთ აქვს ქულა, სასკოლო ფორმას სახელმწიფო დააფინანსებს. რაც შეეხება დედმამიშვილებს, ყველაფერზე მუშაობს სამინისტრო და დეტალები პროცესის დასრულების შემდეგ გახდება ცნობილი. ფორმის დაზიანების შემთხვევაში მშობელს ექნება შესაძლებლობა შეიძინოს ახალი ფორმა ჩვენთან“, – განმარტეს „საგანმანათლებლო რესურსებში“.
ცნობისთვის, განათლების სამინისტროს შპს „საგანმანათლებლო რესურსებმა“ სასკოლო ფორმებზე 44 900 000 ლარის ღირებულების გამარტივებული შესყიდვა 29 აპრილს გამოაცხადა. როგორც დოკუმენტიდან ირკვევა, 2026-2027 სასწავლო წლისთვის დაწყებითი საფეხურის მოსწავლეების სასკოლო ფორმის ტანსაცმლის შესაკერი ერთეულების რაოდენობა ჯამში შეადგენს 1 801 000 ცალს.