წმინდა სინოდს დღეს ხუთი საათი დასჭირდა პატრიარქობის სამი კანდიდატის შესარჩევად. სხდომას 39 წევრიდან 38 დაესწრო და თითოეულმა საკუთარი კანდიდატი დაასახელა.
პატრიარქობის კანდიდატებად დასახელდნენ მოსაყდრე შიო მუჯირი, ფოთის მიტროპოლიტი გრიგოლი და რუის-ურბნისის ეპისკოპოსი იობი. აღნიშნული სამიდან ერთ-ერთი საქართველოს კათოლიკოს-პატრიარქი 17 მაისამდე გახდება.
დღევანდელი კენჭისყრის მიხედვით, მოსაყდრე შიო მუჯირს 20 ხმა აქვს, ხოლო მეუფე იობსა და მეუფე გრიგოლს — შვიდ-შვიდი. დანარჩენი ოთხი წევრის ხმები სხვა კანდიდატებზე გადანაწილდა. ასევე ცნობილი ხდება, რომ კანდიდატებად კიდევ სამი ეპისკოპოსი დასახელდა, თუმცა მათ საკმარისი მხარდაჭერა ვერ მიიღეს.
როგორც ცნობილია, ახალ პატრიარქს სინოდი ხმათა უმრავლესობით ირჩევს. 39 წევრიან სინოდში უმრავლესობა 20 ხმას შეადგენს.
მეუფე ნიკოლოზის განცხადებით, მოსაყდრე შიო მუჯირის მიერ მიღებული ხმების რაოდენობა საკმარისია პატრიარქობისთვის.
ამასთან, პატრიარქობის კანდიდატებად არ დასახელდნენ მეუფე დანიელი და მეუფე ისაია, მიუხედავად იმისა, რომ მათ სინოდში მხარდამჭერები ჰყავდათ. არსებული ინფორმაციით, სინოდმა ვერ მიაღწია შეთანხმებას კანდიდატების შერჩევის კრიტერიუმებზე.
მეუფე დანიელს მაისში 71 წელი უსრულდება, ხოლო მეუფე ისაიას არ აქვს საღვთისმეტყველო განათლების დამადასტურებელი დიპლომი. კრიტერიუმების დაკონკრეტებაზე შეთანხმების არქონის გამო, ამ საკითხზე მსჯელობა აღარ გაგრძელდა.