სინოდის სხდომაზე ფარული კენჭისყრა გაიმართება – კანდიდატების სახელებს ხმამაღლა წაიკითხავენ, შემდეგ კი ბარათებს, რომლებზეც სინოდის წევრებმა არჩევანი დააფიქსირეს, დაწვავენ. ამის შემდეგ კი ცნობილი გახდება იმ კანდიდატების ვინაობა, რომლებსაც მღვდელმთავრები აარჩევენ.
საპატრიარქოში სინოდის სხდომა ამ წუთებშიც მიმდინარეობს. შეკრებას 38 მღვდელმთავარი ესწრება. სხდომაზე ჯანმრთელობის პრობლემების გამო ვერ მოვიდა წილკნისა და დუშეთის მიტროპოლიტი ზოსიმე. ხმების დამთვლელ კომისიას მიტროპოლიტი თეოდორე ჭუაძე ხელმძღვანელობს.
ცნობილია, რომ პატრიარქობის კანდიდატი უნდა აკმაყოფილებდეს შემდეგ მოთხოვნებს: ეროვნებით ქართველი, საქართველოს მართლმადიდებელი ეკლესიის მღვდელმთავარი, ჰქონდეს საღვთისმეტყველო განათლება და საეკლესიო მმართველობის საკმარისი გამოცდილება, ასაკით – არანაკლებ ორმოცი წლისა და არაუმეტეს სამოცდაათი წლისა, უნდა იყოს ბერი.
სინოდის თითოეულ წევრს ერთი საპატრიარქო კანდიდატის, მათ შორის – საკუთარი კანდიდატურის წარდგენის უფლებაც აქვს. სამი მღვდელმთავარი, რომელიც სინოდის სხდომაზე ხმათა უმრავლესობას მიიღებს, კენჭს უკვე გაფართოებულ კრებაზე იყრის. კრებაზე გამართულ კენჭისყრაში მონაწილეობას კი მხოლოდ მღვდელმთავრები მიიღებენ. კათოლიკოს-პატრიარქად არჩეულად ჩაითვლება ის კანდიდატი, რომელიც კრების მონაწილე მღვდელმთავართა ხმების ნახევარზე მეტს მიიღებს.
გაფართოებული კრების მოწვევის თარიღი ეკლესიის მართვა-გამგეობის დებულებითაა დადგენილი – კრება იმართება პატრიარქის გარდაცვალებიდან 40 დღის შემდეგ, მაგრამ არაუგვიანეს ორი თვისა. აღნიშნული კრების გამართვის თარიღი სინოდმა დღევანდელ სხდომაზე უნდა დაადგინოს.