ევროკავშირმა ოფიციალურად დაამტკიცა უკრაინისთვის €90 მილიარდის მოცულობის ფინანსური დახმარების პაკეტი, მას შემდეგ რაც უნგრეთმა ვეტო მოხსნა და მრავალკვირიანი ბლოკირება დასრულდა.
გადაწყვეტილება 23 აპრილს მიიღეს და იგი ითვალისწინებს უკრაინის ფინანსური საჭიროებების დაფარვას უახლოესი ორი წლის განმავლობაში, მათ შორის თავდაცვისა და სახელმწიფო ბიუჯეტის მხარდაჭერას.
ევროკავშირის ლიდერებმა აღნიშნეს, რომ დახმარების პირველი ტრანში შესაძლოა უკვე 2026 წლის მეორე კვარტალში ჩაირიცხოს, რაც ქვეყანას საშუალებას მისცემს გააძლიეროს თავდაცვა, აღადგინოს კრიტიკული ინფრასტრუქტურა და თავიდან აიცილოს ფინანსური კრიზისი.
დახმარების პაკეტი ასევე დაკავშირებულია რუსეთის წინააღმდეგ სანქციების ახალ, მე-20 რაუნდთან, რომელიც მიზნად ისახავს მოსკოვზე ეკონომიკური ზეწოლის გაძლიერებას.
ევროკავშირის ლიდერები და უკრაინის პრეზიდენტი ვოლოდიმირ ზელენსკი გადაწყვეტილებას კვიპროსში გამართულ შეხვედრაზე მიესალმნენ, სადაც უკრაინის მხარდაჭერა ერთ-ერთ მთავარ საკითხად განიხილებოდა.
“ჩვენთვის ეს ძალიან მნიშვნელოვანი გადაწყვეტილებაა და მე ძალიან მადლიერი ვარ ყველა ლიდერის მათი ერთსულოვნებისთვის. ეს არის ჩვენი არმიის გაძლიერება, ეს არის დრონებისა და რადიოელექტრონული ბრძოლის სისტემების ჩვენი შიდა წარმოება. ეს ჩვენი სიცოცხლეა, რადგან საუბარია გადარჩენაზეც. ჩვენ გვქონდა საკმაოდ რთული, მართლაც საშინელი ზამთარი ამ ყველა ბალისტიკური შეტევისა და მასირებული დრონების იერიშების ფონზე. ჩვენ მათი 90%-ზე მეტი გავანადგურეთ, მაგრამ არა ყველა. სწორედ ამიტომ, ჩვენი ენერგოსისტემა მასირებული თავდასხმების ქვეშ მოექცა და ეს ჩვენთვის ძალიან რთული იყო. ახლა ჩვენ დიდ პროგრესს ვაღწევთ ენერგოსისტემის აღდგენაში, უპირველეს ყოვლისა იმისთვის, რომ მოვემზადოთ შემდეგი ზამთრისთვის. ამისთვის ფული გვჭირდება და ძალიან კარგია, რომ ჩვენ ამ თანხის 90 მილიარდიდან ნაწილს ჩვენი ენერგოსისტემის აღსადგენად გამოვიყენებთ. ომის დროს ჩვენ გვჭირდება ყველაფერი და ყველა. რა თქმა უნდა, ჩვენ ძალიან მადლიერები ვართ ევროპის, ისინი ყველაზე დიდი დონორები არიან. დიახ, ჩვენ გვჭირდება ამერიკის შეერთებული შტატებიც. თქვენ იცით, რომ ჩვენ მხოლოდ პარტნიორები არ ვართ არსებობს აშშ-ის პროგრამები, ჩვენ გვჭირდება ანტიბალისტიკური რაკეტები. ჩვენ შევეცდებით ავაშენოთ ჩვენი, უკრაინული ანტიბალისტიკური სისტემა. ჩვენ ეს გვჭირდება და რა თქმა უნდა, ამას გავუზიარებთ ყველა პარტნიორს ყოველგვარი კითხვების გარეშე, რადგან ეს ყველას გვჭირდება. არა მხოლოდ სისტემის შექმნა, არამედ ისეთი შესაძლებლობების შექმნა, რომლებსაც მეტის წარმოება შეუძლიათ. ახლა, თქვენ იცით, რომ აშშ თვეში დაახლოებით 60-65 პატრიოტის ანტიბალისტიკურ რაკეტას აწარმოებს. ეს არაფერია. ახლო აღმოსავლეთზე თავდასხმის პირველივე დღეს მათ ორწლიანი წარმოების მოცულობა გამოიყენეს 24 საათის განმავლობაში. ასე რომ, ჩვენ გვჭირდება ჩვენი, ევროპული, დამოუკიდებელი, ძლიერი სისტემა და ჩვენ მას ავაშენებთ”, – განაცხადა ზელენსკიმ.