ბერი ნიკოლოზი, რომელიც გასულ კვირას თბილისში, ფონიჭალაში, საცხოვრებელ ბინაში გარდაცვლილი იპოვეს, დღეს უკანასკნელ გზაზე სასულიერო პირების ნაწილმა, ოჯახის წევრებმა და მრევლმა გააცილა. პროცესიას, რომელიც ამაღლების ტაძარში მიმდინარეობდა, უამრავი ადამიანი ესწრებოდა. მრევლი ბერის მცხეთაში დაკრძალვას ითხოვდა, თუმცა მათი თქმით, საპატრიარქომ ოჯახს ამ თხოვნაზე უარი უთხრა.
მოქალაქეები, რომლებმაც ბერი ნიკოლოზი უკანასკნელ გზაზე გააცილეს, ამტკიცებენ, რომ მას ჯანმრთელობის სერიოზული პრობლემები ჰქონდა. მრევლის ნაწილმა კი განაცხადა, რომ მედიკოსი, რომელსაც ბერისგან კურთხევა ჰქონდა, მის საცხოვრებელ ბინაში შესულიყო და შეეფასებინა მისი ჯანმრთელობის მდგომარეობა, ბერთან არ შეუშვეს, რის შემდეგაც ბერი ნიკოლოზი ბინაში გარდაიცვალა.
სამგლოვიარო პროცესზე მყოფი ადამიანები ამტკიცებენ, რომ ბერ ნიკოლოზს უამრავი მტერი ჰყავდა. შესაბამისად, ისინი არ გამორიცხავენ, რომ კონკრეტული ადამიანების ჯგუფი მიზანმიმართულად მოქმედებდა, რის გამოც ექიმები მომაკვდავ სასულიერო პირთან არ შეუშვეს. მათთვის უცნობია, თუ ვინ იყვნენ ადამიანები, რომლებიც ბერის მრევლად ასაღებდნენ თავს, თუმცა ამტკიცებენ, რომ მათ ნამდვილად სხვა განზრახვა ჰქონდათ.
არსებული ინფორმაციით, საგამოძიებო უწყებას ბერი ნიკოლოზის მრევლის ნაწილმა კატეგორიული მოთხოვნით მიმართა, რომ დადგინდეს იმ პირების ვინაობა, რომლებმაც მძიმე ჯანმრთელობის მდგომარეობაში მყოფ პირთან მედიკოსი არ შეუშვეს, რის გამოც ბერი ნიკოლოზი გარდაიცვალა. ამ ეტაპზე უცნობია, დაადგინა თუ არა შსს-მ იმ პირების ვინაობა, რომლებმაც განსაცდელში მყოფი ადამიანის დასახმარებლად ექიმი არ შეუშვეს.