დიდმა ბრიტანეთმა მიიღო კანონპროექტი, რომლის მიხედვითაც 2009 წლის შემდეგ დაბადებულ პირებს თამბაქოს შეძენა მთელი ცხოვრების მანძილზე აეკრძალებათ – ინფორმაციას BBC ავრცელებს და წერს, რომ კანონი მაღაზიებს მათთვის თამბაქოს მიყიდვას უკრძალავს, რათა ჩამოყალიბდეს თამბაქოსგან თავისუფალი თაობა.
სამეფო თანხმობის მიღების შემდეგ, მინისტრებს ასევე მიენიჭებათ ახალი უფლებამოსილება თამბაქოს, ვეიპისა და ნიკოტინის პროდუქტების რეგულირებისთვის, რაც მათ არომატებსა და შეფუთვასაც მოიცავს. ეს არის იმ ღონისძიებათა სერიის ნაწილი, რომელიც მიზნად ისახავს მოწევისგან გამოწვეულ ჯანმრთელობის პრობლემებთან ბრძოლას. მოწევა დიდ ბრიტანეთში სიკვდილიანობის, ინვალიდობისა და დაავადებების ერთ-ერთი მთავარი მიზეზია.
“პრევენცია უკეთესია, ვიდრე მკურნალობა. ეს რეფორმა გადაარჩენს სიცოცხლეს, შეამცირებს ზეწოლას ჯანდაცვის ეროვნულ სისტემაზე და შექმნის უფრო ჯანსაღ ბრიტანეთს“ – განაცხადა ჯანდაცვისა და სოციალური დაცვის მდივანმა, უეს სტრიტინგმა.