სახელმწიფო უსაფრთხოების სამსახურის (სუს) 2025 წლის ანგარიშში აღნიშნულია, რომ საქართველოს ოკუპირებულ რეგიონებში რუსეთის პოლიტიკის განხორციელება ვლადიმერ პუტინის ადმინისტრაციის ხელმძღვანელის პირველ მოადგილეს, სერგეი კირიენკოს დაევალა.
სუს-ის ანგარიშის მიხედვით, სერგეი კირიენკოს პოლიტიკა “მოსახლეობის განწყობებსა და აღქმებში ანექსიისთვის ხელსაყრელ ნიადაგს ამზადებდა”.
ანგარიშში აღნიშნულია, რომ “საოკუპაციო ძალა აქტიურად იყენებს საქართველოს ოკუპირებულ ტერიტორიებზე მიმდინარე პროცესებს თბილისზე ზეწოლის ინსტრუმენტად”.
“საქართველოს ოკუპირებულ რეგიონებში რუსეთის პოლიტიკის განხორციელება პრეზიდენტის ადმინისტრაციის ხელმძღვანელის პირველ მოადგილეს, სერგეი კირიენკოს დაევალა.
კირიენკოს პოლიტიკა არა მარტო პროცესების სრულად მართვას ისახავდა მიზნად, არამედ მოსახლეობის განწყობებსა და აღქმებში ანექსიისთვის ხელსაყრელ ნიადაგს ამზადებდა.
ოკუპირებული რეგიონების ახალი “კურატორის” საქმიანობაში ორი მნიშვნელოვანი მიმართულება გამოიკვეთა. ერთი მხრივ, რუსეთმა საოკუპაციო რეჟიმის მიმართ მხარდაჭერა სხვადასხვა სახით, მათ შორის ფინანსური დახმარებით გამოხატა, მეორეს მხრივ კი ანექსიური პროცესებისადმი კრიტიკულად განწყობილ პირთა მიმართ განაგრძო ზეწოლის სხვადასხვა ინსტრუმენტის გამოყენება. კერძოდ, ე.წ. ოპოზიციურად განწყობილი პირების, მათ შორის ჟურნალისტების წინააღმდეგ დაიწყო სისხლისსამართლებრივი დევნა, ჩამოართვა რუსეთის მოქალაქეობა და უცხოეთის აგენტების რეესტრში შეიყვანა.
საოკუპაციო ძალა აქტიურად იყენებს საქართველოს ოკუპირებულ ტერიტორიებზე მიმდინარე პროცესებს თბილისზე ზეწოლის ინსტრუმენტად და პარალელურად ამზადებს საფუძველს, ხელსაყრელ დროს, ანექსიის განსახორციელებლად,” – წერია სახელმწიფო უსაფრთხოების სამსახურის 2025 წლის ანგარიშში.