თბილისში სხვადასხვა მაღაზიათა ქსელიდან ძალის გამოყენებით 6 000 ლარამდე თანხა გაიტაცეს – ინფორმაციას შსს ავრცელებს და წერს, რომ დაკავებულია წარსულში ნასამართლევი პირი და მას 8 წლამდე პატიმრობა ემუქრება.
“…გამოძიებით დადგინდა, რომ ნ.ს. თანამზრახველთან ერთად, თბილისში მდებარე სხვადასხვა მაღაზიათა ქსელში წინასწარი შეთანხმებით შედიოდა, საიდანაც ძალის გამოყენებით 6 000 ლარამდე თანხა გაიტაცეს და შემთხვევის ადგილიდან მიიმალნენ. სამართალდამცველების მიერ, მიმდინარე გამოძიების ფარგლებში, ასევე, ამოღებულია სამეთვალყურეო კამერების ჩანაწერები.
პოლიციამ საქმეზე ჩატარებული ოპერატიული ღონისძიებებისა და საგამოძიებო მოქმედებების შედეგად, ნ.ს. ბრალდებულის სახით დააკავა. ხოლო, დანაშაულში მონაწილე სხვა პირის დადგენისა და დაკავების მიზნით შესაბამისი ღონისძიებები გრძელდება. გამოძიება სისხლის სამართლის კოდექსის 178-ე მუხლით მიმდინარეობს, რაც 8 წლამდე ვადით თავისუფლების აღკვეთას ითვალისწინებს” – წერს შსს.