დონალდ ტრამპის ადმინისტრაციამ სანქცირებული რუსული ნავთობის საზღვაო გზით შესყიდვაზე დაწესებული შეღავათი კიდევ 30 დღით გაახანგრძლივა. ახალი განკარგულების თანახმად, სხვადასხვა ქვეყანას რუსული ნავთობპროდუქტების შეძენა 16 მაისამდე შეეძლება. როგორც ირკვევა, ვაშინგტონის ახალი გადაწყვეტილება ჯამში 200 მილიონ ბარელ ნავთობზე იქონიებს გავლენას. ინფორმაციას “BM.ge” ავრცელებს
გავრცელებული ცნობებით, თეთრ სახლზე ზეწოლა აზიელმა პარტნიორებმა, მათ შორის ინდოეთის პრემიერ-მინისტრმა, ნარენდრა მოდიმ განახორციელეს.
ცნობისთვის, მანამდე არსებულ 30-დღიან საშეღავათო პერიოდს ვადა 11 აპრილს ამოეწურა. მნიშვნელოვანია ითქვას, რომ ეს გამონაკლისი ირანთან, კუბასთან და ჩრდილოეთ კორეასთან დაკავშირებულ ტრანზაქციებზე არ ვრცელდება.
აღსანიშნავია, რომ ამერიკელმა კანონმდებლებმა მიღებული გადაწყვეტილების გამო ადმინისტრაცია გააკრიტიკეს და ის მოსკოვისთვის ხელის შეწყობაში დაადანაშაულეს. დემოკრატი კონგრესმენების განმარტებით, მსგავსი ნაბიჯები რუსეთს ბიუჯეტის შევსებაში და უკრაინასთან ომის დაფინანსებაში ეხმარება. აღსანიშნავია, რომ ამ პოზიციას ევროკომისიის პრეზიდენტი ურსულა ფონ დერ ლაიენიც იზიარებს. მისი თქმით, ახლა რუსეთის წინააღმდეგ სანქციების შემსუბუქების დრო არ არის.
შეგახსენებთ, რომ ირანთან სამხედრო კონფლიქტი უკვე მერვე კვირაა გრძელდება. საბრძოლო მოქმედებებმა ახლო აღმოსავლეთში უკვე 80-ზე მეტი ენერგეტიკული ობიექტი დაზიანდა.