ამერიკული მედიის ინფორმაციით, თბილისში „ტრამპ თაუერის“ მშენებლობა იგეგმება. ირკვევა, რომ დონალდ ტრამპის ოჯახის კომპანია ადგილობრივ პარტნიორებთან ერთად 70 სართულიანი ცათამბჯენს ააშენებს.
სტატიიდან ირკვევა იმ კომპანიების ჩამონათვალიც, რომლებიც აღნიშნულ მშენებლობას ჩაუდგებიან სათავეში. საუბარია “არქი ჯგუფსა” და “ბიოგრაფზე”. მედიაში ასევე გავრცელდა ფოტო, სადაც, გავრცელებული ინფორმაციით, ივანიშვილის პარტიასთან დაკავშირებული დეველოპერები ჩანან.
პარალელურად, სოციალურ ქსელში ვრცელდება ბიძინა ივანიშვილის განცხადება, რომელიც მან წლების წინ გააკეთა და სადაც მსგავს პროექტს სკეპტიკურად აფასებს. მაშინ ივანიშვილი ამბობდა, რომ აღნიშნული პროექტი საერთოდ არ აინტერესებს.
“ტრამპს არავითარი ინვესტიცია არ გაუკეთებია საქართველოში. ორივემ გამოიყენეს, კარგი ტრიუკი გააკეთეს, ორივეს აინტერესებდა, რაღაც ფული გადაუხადეს ტრამპს, სააკაშვილი კიდევ როგორც ოსტატი სიცრუის, ეს გამოიყენა და მე არ ვიცი რა პროექტზეა საუბარი, მე მისთვის სეიოზულად არ შემიხედავს და არც მაინტერესებს”, – თქვა წლების წინ ივანიშვილმა.
გავრცელებულ ცნობებს ოპოზიციის ნაწილი გამოეხმაურა და აცხადებს, რომ პროექტთან დაკავშირებული კონსორციუმი, მათი შეფასებით, ბიძინა ივანიშვილის დავალებით იქმნება. მათი თქმით, ივანიშვილს ამ გზით ამერიკული სანქციების თავიდან აცილება სურს.
“ქოცი ბიზნესმენები კონსორციუმს ქმნიან ივანიშვილის დავალებით, რომ თბილისში ტრამპის სახელობის ცათამბჯენი ააშენონ. გვიანაა. ბათუმიდან რომ გამოაგდეს მაშინ სჭირდებოდა ტრამპს ეს პროექტი, თორემ დღეს მხოლო კატარის ემირი თვითმფრინავს რომ სჩუქნის, იქედან ზუსტად 5 ცათამბჯენი გამოდნება.
არაფერი უშველის ივანიშვილს და არც მის ლაქია ბიზნესს სანქციებისგან თავის დასაღწევად”, – წერს რომან გოცირიძე სოციალურ ქსელში.