ადამიანი, რომელმაც დღეს კიევში 6 ადამიანი მოკლა, ადრე უკვე იყო სისხლის სამართლის პასუხისმგებლობაში მიცემული. ამის შესახებ პრეზიდენტმა ვლადიმირ ზელენსკიმ ვიდეომიმართვაში განაცხადა.
„ცნობილია, რომ თავდამსხმელმა ცეცხლი წაუკიდა ბინას, სანამ ქუჩაში იარაღით გავიდოდა. ადრე ის უკვე იყო სისხლის სამართლის პასუხისმგებლობაში მიცემული. დიდხანს ცხოვრობდა დონეცკის ოლქში. დაბადებულია რუსეთში. ახლა დგინდება ყველაფერი, რაც მასზე შეიძლება იყოს ცნობილი და რატომ ჩაიდინა ეს. საჭიროა ყველა დეტალის გადამოწმება“, — თქვა პრეზიდენტმა.
მისი თქმით, გამომძიებლებს ინციდენტთან დაკავშირებით რამდენიმე ვერსია აქვთ. თუმცა ზელენსკის არცერთი ვერსია არ დაუსახელებია, მაგრამ აღნიშნა, რომ სამართალდამცველები საზოგადოებას აცნობებენ, როგორც კი გადამოწმებული ინფორმაცია იქნება. „ეს სრულიად საშინელი რამაა. ჩვეულებრივ დღეს, ჩვეულებრივ ადგილზე ადამიანების დაკარგვა. მარადიული ხსოვნა დაღუპულებს“, – აღნიშნა ვიდეომიმართვაში პრეზიდენტმა.
როგორც UNIAN წერს, მეზობლების თქმით, თავდამსხმელი მარტო ცხოვრობდა, ოჯახი არ ჰყავდა. მეზობლები მას აღწერენ როგორც ინტელიგენტ, მშვიდ ადამიანს, რომელიც ყოველთვის ზურგჩანთით დადიოდა, თავაზიანად ესალმებოდა და ადამიანებთან თითქმის არ ურთიერთობდა. ბინა კიევში მან დაახლოებით ათი წლის წინ შეიძინა, სავარაუდოდ, დონბასში ომის დაწყების პერიოდში.