ანდრო ჭიჭინაძის მამა, ოთარ ჭიჭინაძე ამბობს, რომ სააპელაციო საასმართლოსგან სხვა გადაწყვეტილების მოლოდინი არ ჰქონდა, გარდა იმისა, რაც მოსამართლე თეა ლეონიძემ გამოაცხადა.
ეს იყო პროცესი პროცესის გამო – ამბობს მსჯავრდებული მსახიობის მამა.
“გამართლდა ის მოლოდინი, რაც მქონდა, რომ აბსოლუტურად არაფერი შეიცვლებოდა. თავიდანვე ასეთი განწყობა მქონდა, რომ არაფერი მოხდებოდა ჩვენთვის სასიკეთო. ეს იყო უბრალოდ პროცესი პროცესის გამო, რომ დაენახებინათ, რაღაც ხდება – სინამდვილეში არაფერი“,- განაცხადა ჭიჭინაძემ.
სააპელაციო სასამართლომ ანდრო ჭიჭინაძის, ონისე ცხადაძის, ჯანო არჩაიას, რუსლან სივაკოვის, ლუკა ჯაბუას, გურამ მირცხულავას, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კინაძისა და სერგეი კუხარჩუკის მიმართ პირველი ინსტანციის სასამართლოს მიერ გამოტანილი 2 წლიანი განაჩენი ძალაში დატოვა. გადაწყვეტილება ცოტა ხნის წინ მოსამართლე თეა ლეონიძემ გამოაცხადა.
განაჩენის გამოცხადებას დარბაზში ხმაური და საპროტესტო შეძახილები მოჰყვა.