კორონავირუსის ახალი ვარიანტი „ციკადა“ 30-ზე მეტ ქვეყანაშია გავრცელებული, საქართველოში ჯერ არის დადასტურებული – „ციკადა“ ბავშვებში უფრო მეტად არის გავრცელებული, გაციების სიმპტომატიკას იწვევს და განსაკუთრებული სიმძიმით არ მიმდინარეობს, – ამის შესახებ იაშვილის სახელობის ბავშვთა ცენტრალური საავადმყოფოს სამედიცინო დირექტორმა, პროფესორმა ივანე ჩხაიძემ კორონავირუსის ახალ ვარიანტ „ციკადაზე“ საუბრისას განაცხადა.
როგორც ივანე ჩხაიძემ განაცხადა, მას მძიმე მიმდინარეობა არ ახასიათებს, თუმცა არის მეტად გადამდები.
„ფაქტია, ბოლო თვეებია კორონავირუსის სხვა ვარიანტს შორის „ციკადას“ გავრცელება ერთ-ერთი ყველაზე ხშირია.
„ციკადა“ არის მწერი, რომელსაც შეუძლია მატლის სახით 12-14 წელი იყოს მიწაში და შემდეგ დაიწყოს ცხოვრება. ასეა კორონავირუსიც, წელიწადზე მეტი გაჩერებული იყო, არ ამჟღავნებდა აქტიურობას, მაგრამ ბოლო 3 თვის განმავლობაში შემთხვევებმა მოიმატა და ძალიან ბევრ ქვეყანაში გახდა ერთ-ერთი ყველაზე ხშირი გავრცელების. ის „ომიკრონის“ ქვევარიანტია.
„ციკადა“ 30-ზე მეტ ქვეყანაშია დაფიქსირებული. ვერ გეტყვით, საქართველოში არის თუ არა დადასტურებული მისი არსებობა.
მას მძიმე მიმდინარეობა არ ახასიათებს, თუმცა არის მეტად გადამდები. სიმპტომები კი სტანდარტულია: ტემპერატურა, ყელის ტკივილი, ხველა, ცხვირიდან გამონადენი. აბსოლუტურ უმრავლეს შემთხვევაში მსუბუქი მიმდინარეობით ხასიათდება და მას გამოარჩევს ის, რომ სხვა ასაკთან შედარებით, ბავშვებში უფრო მეტად არის გავრცელებული.
იცით, რომ კორონავირუსის თავდაპირველი ვარიანტი უფრო მეტად მოზრდილებში იყო გავრცელებული. ახლა, არის მოსაზრება, რომ ახალი ვარიანტი ბავშვებში უფრო მეტად არის გავრცელებული. ბავშვებში გაციების სიმპტომატიკა იწვევს და განსაკუთრებული სიმძიმით არ მიმდინარეობს“, – აღნიშნა ივანე ჩხაიძემ „მედიაცენტრ მთავარში“.
ამასთან, როგორც მან განმარტა, ქვეყანაში გრიპის ვირუსის გავრცელების მაჩვენებელი ძალიან ცოტაა და ის 3%-ს შეადგენს.