მსახიობ ანდრო ჭიჭინაძის ადვოკატი, თორნიკე მიგინეიშვილი ამბობს, რომ პროევროპულ აქციებზე დაკავებული 11 პატიმრის საქმე ჯერ უზენაესში, შემდეგ კი სტრასბურგის სასამართლოში წავა.
მას შემდეგ, რაც სააპელაციო სასამართლომ ძალაში დატოვა პირველი ინსტანციის გადაწყვეტილება, დაცვის მხარე აპირებს, რომ საქმე ადამიანის უფლებათა ევროპულ სასამართლომდე მიიყვანოს.
თორნიკე მიგინეიშვილის თქმით, ამ რეალობაში, რაც ახლა საქართველოშია, სწორედ სტრასბურგის სასამართლო არის “ეფექტური გზა, რომ სიმართლე იპოვო”.
“ზოგადად, საქართველოში მართლმსაჯულება არის ფორმალური. ისევ იმიტომ, რომ ფორმალურად მოითხოვს ეს პროცედურა, განაჩენს ჩვენ უზენაეს სასამართლოში გავასაჩივრებთ და შემდეგ უკვე ადამიანის უფლებათა ევროპულ სასამართლოში, რომელიც ამ რეალობაში, როდესაც ქვეყანაში არ არსებობს სამართალი, არის ეფექტური გზა, რომ იპოვო სიმართლე” – ამბობს ადვოკატი.
სააპელაციო სასამართლომ ანდრო ჭიჭინაძის, ონისე ცხადაძის, ჯანო არჩაიას, რუსლან სივაკოვის, ლუკა ჯაბუას, გურამ მირცხულავას, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კინაძისა და სერგეი კუხარჩუკის მიმართ პირველი ინსტანციის სასამართლოს მიერ გამოტანილი 2 წლიანი განაჩენი ძალაში დატოვა. გადაწყვეტილება ცოტა ხნის წინ მოსამართლე თეა ლეონიძემ გამოაცხადა.
განაჩენის გამოცხადებას დარბაზში ხმაური და საპროტესტო შეძახილები მოჰყვა.