დიუშენის კუნთოვანი დისტროფიით დაავადებული ბავშვების მშობლები მთავრობის ადმინისტრაციასთან აქციას მართავენ.
როგორც „ძლიერი საქართველო-ლელოს“ წევრმა ქეთი თურაზაშვილმა აქციაზე ჟურნალისტებთან განაცხადა, მესამე თვეა მშობლები უშედეგოდ იბრძვიან საკუთარი შვილების სიცოცხლისთვის და ჯანმრთელობისთვის, „ქართულ ოცნებას“ კი ის მოქალაქეები, რომლებსაც სერიოზული პრობლემები აქვთ, არ აინტერესებს.
„მესამე თვეა მშობლები უშედეგოდ იბრძვიან საკუთარი შვილების სიცოცხლისთვის და ჯანმრთელობისთვის, მესამე თვეა ითხოვენ მედიკამენტს, სპეციალურ პროგრამას, მაგრამ არც პრემიერ-მინისტრი და არც ჯანდაცვის მინისტრი არ ხვდება მშობლებს, სამარცხვინოდ იმალებიან მესამე თვეა. ძალიან მარტივია შეხვედრა, მოსმენა, თანაგრძნობა და მოქმედება. პასუხისმგებლობიანი ხელისუფლება სწორედ ასე მოიქცეოდა. სამწუხაროდ გვაქვს ძალიან რთული და მძიმე მოცემულობა, საერთოდ არ აინტერესებს „ქართულ ოცნებას“ და მის მაღალჩინოსნებს ჩვენი მოქალაქეები და განსაკუთრებით ის მოქალაქეები, რომლებსაც სერიოზული პრობლემები აქვთ.
სულ რომ ერთი ადამიანი იდგეს ასეთი მძიმე მოთხოვნით, ერთ ადამიანს უნდა შეხვდე, როდესაც ხარ ქვეყნის პრემიერ-მინისტრი, უფრო სწორად როდესაც გქვია პრემიერ-მინისტრი. აქ ათობით მშობელი დგას, რომელიც იბრძვის საკუთარი შვილისთვის.
ბედავენ ირაკლი კობახიძე და მიშა სარჯველაძე და არ ხვდებიან ამ ადამიანებს, არ უსმენენ მათ, არადა რომ კითხო ხან რის კომისიას ქმნიან და ხან რისას. ქმნიან ილუზიას ვითომ რამეზე მუშაობენ. რეალურად ასეთ მძიმე საკითხებზე უნდა ისხდნენ და მუშაობდნენ თავაუღებლად. სამწუხაროდ საქართველოს ჰყავს უპასუხისმგებლო ხელისუფლება, რომელიც ძალიან მალე უნდა შევცვალოთ და შევცვალოთ სამართლიანი არჩევნების გზით“, – აღნიშნავს თურაზაშვილი.
მშობლებს მთავრობის ადმინისტრაციასთან მიტანილი აქვთ ბანერები წარწერით: „ყოველი დღე არის ბრძოლა სიცოცხლისთვის“.