შსს-სა და თავდაცვის სამინისტროსთვის უვარგისი კონსერვების მიწოდებისთვის დაკავებული “კულას” დამფუძნებელი, ვანო გოგლიძე გირაოს სანაცვლოდ გაათავისუფლეს – ინფორმაციას BMG ადვოკატზე დაყრდნობით ავრცელებს.
ვანო გოგლიძე შს და თავდაცვის სამინისტროებისთვის ფალსიფიცირებული კონსერვის მიწოდების ბრალდებით თებერვალში დააკავეს.
“გამოძიებით დადგინდა, რომ ბრალდებულმა, 2025 წელს, სახელმწიფო ტენდერის საფუძველზე გაფორმებული ხელშეკრულების ფარგლებში, 380 792 ლარის ღირებულების 24 177.3 კილოგრამი თევზის კონსერვი მიაწოდა სასაზღვრო პოლიციასა და შპს „სახელმწიფო კვებით უზრუნველყოფას“. აღნიშნული პროდუქცია განკუთვნილი იყო საქართველოს შინაგან საქმეთა და თავდაცვის სამინისტროების თანამშრომელთა კვებისთვის.
საგამოძიებო მოქმედებების შედეგად, მათ შორის საწარმოს ჩხრეკისას, ამოღებულია 17 241 ერთეული ფალსიფიცირებული თევზის კონსერვი. ასევე დადგინდა, რომ პროდუქციის დამზადებისა და ნედლეულის შენახვის პირობები კრიტიკულად არ შეესაბამებოდა სურსათის უსაფრთხოების მოთხოვნებს. ამოღებულ პროდუქტებზე ჩატარებული ქიმიური და მიკრობიოლოგიური ექსპერტიზის დასკვნით, კონსერვი არ აკმაყოფილებს მიკრობიოლოგიურ სტანდარტებს და უვარგისია მოხმარებისთვის. რიგ შემთხვევებში ექსპერტიზის ჩატარება ვერ მოხერხდა, რადგან პროდუქცია მაღალი ტოქსიკურობის გამო საფრთხეს უქმნიდა თავად ექსპერტის სიცოცხლესა და ჯანმრთელობას” – აცხადებდა ფინანსთა სამინისტროს საგამოძიებო სამსახური.
გოგლიძისთვის წაყენებული ბრალდება – 197-ე მუხლის მე-3 ნაწილი – 5-დან 7 წლამდე ვადით თავისუფლების აღკვეთას ითვალისწინებს. 21 თებერვალს მას აღკვეთის ღონისძიების სახით პატიმრობა შეეფარდა