მოკლული მასწავლებლის, გიგა ავალიანის საქმის პროკურორმა ქეთევან სონიძემ დღევანდელი სასამართლო პროცესის შემდეგ განაცხადა, რომ ანი ნასყიდაშვილმა ზუსტად იცოდა დაგეგმილი დანაშაულის შესახებ.
“ანი ნასყიდაშვილმა ზუსტად იცოდა, რომ მზადდებოდა დანაშაული, რომელიც მიმართული იყო გიგა ავალიანის წინააღმდეგ და ასევე ცალსახად იცოდა ის, თუ როგორ ჩაიდინეს აღნიშნული დანაშაული ბრალდებულებმა.
ამას ადასტურებს ანი ნასყიდაშვილსა და ალექსანდრე გაბაშვილს შორის დანაშაულის წინა დღეს და ორი დღით ადრე არსებული მიმოწერები, სადაც ანი ნასყიდაშვილი პირდაპირ ეუბნება ალექსანდრე გაბაშვილს, რომ წინასწარ ეცოდება და წარმოუდგენია, თუ რას დამართებენ გიგა ავალიანს თავდასხმის შემთხვევაში ბრალდებულები. ცინიკურად, ვითომ თანაგრძნობასაც კი გამოხატავდა მომავალ მსხვერპლთან გიგა ავალიანთან დაკავშირებით” – განაცხადა დღევანდელი სასამართლო პროცესის შემდეგ, გიგა ავალიანის საქმის პროკურორმა ქეთევან სონიძემ.
მისივე თქმით, ბრალდებულებთან ანი ნასყიდაშვილთან და დემეტრე ჩიქოვანთან საპროცესო შეთანხმების თაობაზე მოლაპარაკება არ მიმდინარეობს და ორივე დაკავებული დუმილის უფლებას იყენებს.
დემეტრე ჩიქოვანს გამოძიება გიგა ავალიანის თავდასხმის მომზადებას, ხოლო ანა ნასყიდაშვილს შეუტყობინებლობას ედავება.