„ევროკავშირის ქვეყნების ელჩებმა სომხეთში ახალი სამოქალაქო მისიის გაგზავნის შესახებ მიიღეს გადაწყვეტილება – ინფორმაციას რადიო თავისუფლების სომხური სამსახური ავრცელებს.
დოკუმენტის თანახმად, მისიამ უნდა გააძლიეროს სომხეთის მდგრადობა ჰიბრიდული საფრთხეების მიმართ. მისია სომხურ მხარეს დაეხმარება კიბერშეტევებთან და დეზინფორმაციასთან ბრძოლაში, ასევე ქვეყანაში უკანონო ფულის ნაკადის შესვლის გაკონტროლებაში.
ევროკავშირის ახალი მისია სომხეთში, სავარაუდოდ, 2-წლიანი იქნება და 20-30 თანამშრომელი ეყოლება. მისია ღია იქნება მესამე ქვეყნებისთვისაც, თუკი ბრიუსელი მათთან შესაბამის შეთანხმებას მიაღწევს. ეს იქნება სომხეთში ევროკავშირის მეორე მისია. ამ დროისათვის იქ უკვე არსებობს საზღვრის სადამკვირვებლო წარმომადგენლობა [EUMA].