სასახლის ღობის საქმე – მოსამართლე თამარ მახარობლიძემ ბრალდებული გიორგი კირვალიძე დარბაზიდან გააძევა.
სასამართლო პროცესზე, სადაც მთავარი გამომძიებელი, კონსტანტინე კერესელიძე იკითხება, კირვალიძემ მოწმე პოლიციელს უთხრა, რომ “სტანდარტული მატყუარაა”.
ბრალდებულმა ასევე განაცხადა, რომ აქციასთან შეხება არ ჰქონია და სასამართლო პროცესები ჩრდილოეთ კორეის მაგალითს შეადარა, რის შემდეგაც მოსამართლემ ის სხდომიდან გააძევა.
“თქვენ ბიძინას რობოტუნები…ჩვენ კიდე შევხვდებით” – თქვა კირვალიძემ დარბაზის დატოვებისას.
ცნობისთვის, კახაბერ კვაჭანტირაძეს, სიმონ მახარაძეს, გია თოლორაიას, ავთანდილ თოფჩიშვილს, მიხეილ თოლორაიას, იური ლომიძეს, გიორგი ტალახაძეს, დავით გიუნაშვილს, საბა კორძაიას, გიორგი კირვალიძეს, კობა ეპიტაშვილს, მანუჩარ მიქელაძეს და ბექა მაჭავარიანს ბრალი წარდგენილი აქვთ საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით, რაც სტრატეგიული და განსაკუთრებული მნიშვნელობის ობიექტების ჯგუფურად ხელში ჩაგდების ან ბლოკირების მცდელობას გულისხმობს.
გარდა ამისა, მათ ასევე ედავებიან სსკ-ის 225-ე მუხლის მეორე ნაწილით გათვალისწინებულ დანაშაულს, რაც ჯგუფურ ძალადობაში მონაწილეობას მოიცავს.