დისიდენტი ბელარუსი ფოტოგრაფი ალექსანდრ შიშკო თბილისიდან დაბრუნებისთანავე მინსკის აეროპორტში დააკავეს – ინფორმაცია Dissidentby-ის ვებგვერდზე ვრცელდება.
უფლებადამცველ რომან კისლიაკის განცხადებით, შიშკო 2022 წლიდან ცხოვრობდა თბილისში და უცნობია, რატომ მიიღო ბელარუსში დაბრუნების გადაწყვეტილება – “შესაძლოა, ენატრებოდა სამშობლო და ოჯახი. ვფიქრობ, მან არასწორად გათვალა დაკავების რისკი” – ამბობს უფლებადამცველი.
“რამდენადაც ვიცი, 2024 წელს სისხლის სამართლის საქმე აღიძრა თავისუფლების დღეების საზღვარგარეთ ჩატარებასთან დაკავშირებით და ამ საქმის ფარგლებში, ბელარუსში მისი ბინა გაჩხრიკეს” – ამბობს ის.
ბელარუსის ხელისუფლება რეგულარულად იმუქრება საზღვარგარეთ საჯარო ღონისძიებებში მონაწილეთა სისხლისსამართლებრივი დევნის ბრალდებით. 3 აპრილს გავრცელდა ინფორმაცია, რომ პოლონეთ-ბელორუსის საზღვარზე დააკავეს ფოტოგრაფი ანდრეი ლიანკევიჩი.