პოლონეთში, პოზნანის პროკურატურამ 5 თვის ჩვილის გარდაცვალების საქმეზე ბავშვის მამის – საქართველოს მოქალაქის დაკავების ორდერი გასცა – სამართალდამცველები 1978 წელს დაბადებულ ნუგზარ ქავთარაშვილს ამ დრომდე ეძებენ. პოლონურ მედიაში ვრცელდება კაცის ფოტოც.
დაკავების ორდერი არასრულწლოვანი შვილის სიცოცხლისთვის საშიშ მდგომარეობაში დატოვების ბრალდებით გაიცა. 10 აპრილს სასამართლომ მას აღკვეთის ღონისძიების სახით პატიმრობა დაუსწრებლად შეუფარდა. ამავე საქმეზე დაკავებულია ბავშვის დედა, საქართველოს მოქალაქე და ოჯახის ახლობელი 2 კაცი, რომელთაგან ორივე მოლდოვის მოქალაქეა.
პოლონურმა მედიამ რამდენიმე დღის წინ სასამართლო სამედიცინო ექსპერტზე დაყრდნობით გაავრცელა ინფორმაცია, რომ 5 თვის ქართველი ბავშვის დაზიანებები შესაძლოა გამოწვეული ყოფილიყო “ინტენსიური რხევით, თავის დარტყმით მყარ ზედაპირზე ან იატაკზე დაგდებით”. ბავშვს თავის ქალის მოტეხილობა და ჰემატომები აღენიშნებოდა. ჩვილი რამდენიმედღიანი მკურნალობის შემდეგ 8 აპრილს საავადმყოფოში დაიღუპა.