რუის-ურბნისის ეპარქიაში, ამბიონიდან არქიმანდრიტმა გიორგი აბდუშელიშვილმა რუსული გავლენების გაძლიერებაზე, ე.წ. აგენტურის ზრდასა და ეკლესიის შიდა პროცესებზე ისაუბრა.
სასულიერო პირი ქადაგებისას კრიტიკულ გზავნილებს ავრცელებდა, თუმცა კონკრეტული პირები ან ჯგუფები არ დაუსახელებია. მამა გიორგი აბდუშელიშვილი სწორედ რუის-ურბნისის ეპარქიის მღვდელმსახურია და მისი განცხადებები უკვე განხილვის საგნად იქცა.
აღსანიშნავია, რომ ამავე ეპარქიის მღვდელმთავარი, მეუფე იობი, პატრიარქობის ერთ-ერთ შესაძლო კანდიდატად მოიაზრება. ქადაგებაში მნიშვნელოვანი გზავნილები ჰქონდა თავად მეუფე იობსაც — მან ისაუბრა ახალი პატრიარქის არჩევის პროცესზე და ხაზი გაუსვა მონარქიის აღდგენის მნიშვნელობას.
მიმდინარე პროცესები ეკლესიაში აქტიურ ფაზაში შედის. მიუხედავად რთული კვირისა, ეპარქიებში უკვე დაწყებულია მზადება ახალი პატრიარქის არჩევასთან დაკავშირებით. ამ ეტაპზე, პირველი, ვინც გაფართოებული კრებისთვის საეპარქიო კრება მოიწვია და დელეგატები შეარჩია, მესტიისა და ზემო სვანეთის ეპარქიაა.
მეუფე ილარიონმა უკვე დაასახელა ის სასულიერო პირები, რომლებიც სამებაში დაგეგმილ გაფართოებულ კრებაში მიიღებენ მონაწილეობას. იგი ღიად პოზიციონირდება მეუფე იობის მხარდამჭერად — რამდენიმე დღის წინ კი ხონისა და სამტრედიის მიტროპოლიტის მიერ მეუფე იობთან დაკავშირებით გაკეთებული შეფასებების ფორმაც გააკრიტიკა.