მარნეულის მერის, დაურ ისმაილოვის ძმა, ქენან ისმაილოვი, რომელიც ჯგუფური ძალადობაშია ბრალდებული წინასწარი პატიმრობა შეუფარდეს. მოსამართლე გვანცა ჩიქოვანმა პროკურატურის შუამდგომლობა დააკმაყოფილა.
ისმაილოვების ოჯახი სასმართლოს გირაოს სახით 100 000 ლარს სთავაზობდა. სასამართლო პროცესზე მარნეულის მერი არ გამოჩენილა. დუმილი არ დაურღვევია თავად ბრალდებულსაც.
პროკურატურის ინფორმაციით, 2026 წლის 6 აპრილს მარნეულის მუნიციპალიტეტში, ბიზნესსაქმიანობასთან დაკავშირებით მომხდარი შელაპარაკების გამო, ბრალდებულმა თანმხლებ პირებთან ერთად ხელკეტების გამოყენებით დაზარალებულს დაზიანებები მიაყენეს.
ქენან ისმაილოვს ბრალდება საქართველოს სისხლის სამართლის კოდექსის 120-ე მუხლის მეორე ნაწილით (ჯანმრთელობის განზრახ მსუბუქი დაზიანება, ჯგუფურად) წარედგინა, რაც 3-დან 5 წლამდე პატიმრობას ითვალისწინებს.
ცნობილია, რომ შინაგან საქმეთა სამინისტროში გამოძიება გრძელდება დანაშაულში მონაწილე სხვა პირების გამოვლენის მიზნით.
პლატფორმა „თემის“ დამფუძნებელ სამირა ბაირამოვას ინფორმაციით, ქენან ისმაილოვმა, თავისი გარემოცვის წევრებთან ერთად, პურის საცხობის მეპატრონეს სცემა. არსებული ინფორმაციით, კაცი იმდენად იყო ნაცემი, რომ მან საწყის ეტაპზე პოლიციას ჩვენებაც კი ვერ მისცა.
გავრცელებული ინფორმაციით, მერის ოჯახი ბიზნესმენს პურის ფასის ზრდას აიძულებდა, რასაც ეს უკანასკნელი არ დათანხმდა, რასაც სავარაუდოდ ანგარიშსწორება მოჰყვა.