აფგან სადიგოვი აზერბაიჯანში დააკავეს.
„ახლახან მიღებული ინფორმაციის მიხედვით, ჩემი მეუღლე, აფგან სადიგოვი, პოლიციამ დააკავა და ზუსტად არ ვიცი, სად გადაიყვანეს (არსებობს ვარაუდი, რომ ხათაის რაიონის 34-ე განყოფილებაში).
გუშინ კი ის პოლიტიკური მოტივით საქართველოდან აზერბაიჯანში იქნა დეპორტირებული“ — წერს სოციალურ ქსელში სადიგოვის ცოლი, სევინჩ სადიგოვა.
„ფორმულას“ ინფორმაციას აფგან სადიგოვის დაკავების შესახებ მისი ადვოკატი, ნემათ ქერიმლი, უდასტურებს.
აზერბაიჯანელი ჟურნალისტი თბილისში 4 აპრილის საღამოს დააკავეს. ღამის 4 საათზე გამართულ პროცესზე თბილისის საქალაქო სასამართლოს მოსამართლე თორნიკე ქოჩქიანმა მისი ქვეყნიდან გაძევების, 2 000 ლარით დაჯარიმებისა და საქართველოში შემოსვლის 3-წლიანი აკრძალვის გადაწყვეტილება გამოაცხადა.
სადიგოვი ფეისბუქ პოსტის გამო, პოლიციისთვის შეურაცხყოფის მიყენების საბაბით დააკავეს. როგორც შსს-მ განმარტა, “ქართული მხარისთვის, რამდენიმე დღის წინ, ოფიციალური წყაროებით ცნობილი გახდა, რომ აზერბაიჯანის პროკურატურამ საქმეზე, რომელზეც სტრასბურგის სასამართლოს გაცემული ჰქონდა დროებითი ღონისძიება, სისხლის სამართლებრივი დევნა შეწყვიტა, შესაბამისად, საქართველოშიც შეწყვეტილია ყოველგვარი საექსტრადიციო პროცედურები”.