პროკურატურამ პირადი ცხოვრების საიდუმლოს უკანონოდ მოპოვების, შენახვის, გავრცელების, სიცოცხლის მოსპობის მუქარის და ძალადობის ფაქტებზე ერთ პირს ბრალდება წარუდგინა, – ამის შესახებ განცხადებას პროკურატურა ავრცელებს.
„საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა უკანონოდ მოიპოვა, შეინახა და შემდეგ გაავრცელა მისი მეგობარი მამაკაცის მობილურ ტელეფონში არსებული პირადი ცხოვრების საიდუმლოს შემცველი ინფორმაცია. მან ასევე ფიზიკურად იძალადა სხვა, ხანში შესული ქალბატონის მიმართ და კიდევ ერთ პირს სიცოცხლის მოსპობით დაემუქრა.
სამართალდამცველებმა ბრალდებული 1 აპრილს სასამართლოს განჩინების საფუძველზე დააკავეს. მას ბრალდება საქართველოს სისხლის სამართლის კოდექსის 157-ე პრიმა მუხლის პირველი ნაწილით (პირადი ცხოვრების საიდუმლოს უკანონოდ მოპოვება, შენახვა, გავრცელება), საქართველოს სისხლის სამართლის კოდექსის 151-ე მუხლის პირველი ნაწილით (სიცოცხლის მოსპობის მუქარა) და საქართველოს სისხლის სამართლის კოდექსის 126-ე მუხლის პირველი ნაწილით (ძალადობა) წარედგინა, რაც სასჯელის სახედ და ზომად 7 წლამდე თავისუფლების აღკვეთას ითვალისწინებს“, – ნათქვამია განცხადებაში.