პუტინის სპეციალური გადაწყვეტილებით, 14 წლამდე ასაკის ბავშვები რუსეთიდან ოკუპირებულ აფხაზეთში გამგზავრებას დაბადების მოწმობით შეძლებენ. ამის შესახებ პუტინის წარმომადგენელმა, სერგეი კირიენკომ განაცხადა, რომელიც აფხაზეთში იმყოფება.
ფორუმზე სახელწოდებით, „აფხაზეთი – ინვესტიციები მომავალში“ სიტყვით გამოსვლისას კირიენკომ განაცხადა, რომ 2 აპრილს პუტინმა სპეციალური გადაწყვეტილება მიიღო, რომლის მიხედვითაც “აფხაზეთისთვის 2026–2027 წლებში შენარჩუნდება რუსეთიდან 14 წლამდე ასაკის ბავშვების დაბადების მოწმობით შესვლის შესაძლებლობა“.
კირიენკომ აღნიშნა, რომ ეს გადაწყვეტილება ტურისტული ნაკადის გაზრდას შეუწყობს ხელს.
20 იანვრიდან რუსეთმა აამოქმედა კანონი, რომლის მიხედვითაც ბავშვებს მეზობელ ქვეყნებში [სომხეთი, ყაზახეთი, ყირგიზეთი და ა.შ.] წასასვლელად აუცილებლად სჭირდებათ საზღვარგარეთის პასპორტი. თუმცა, ტურისტული სექტორის თხოვნით, პუტინმა ოკუპირებული აფხაზეთისთვის და ბელარუსისთვის ეს წესი დროებით გააუქმა, შესაბამისად, 2026-2027 წლებში რუსი ბავშვები ისევ მხოლოდ დაბადების მოწმობით შეძლებენ იქ შესვლას.