“ადგილზე ვიყავი, საშინელი სანახავი იყო” – ვინ არის სამტრედიაში ავარიას შეწირული ხუთი ადამიანი

სამტრედიის შესასვლელთან ავტოსაგზაო შემთხვევის შედეგად დაღუპულები ჩოხატაურიდან არიან.

„ადგილზე ვიყავი, საშინელი სანახავი იყო. გოგონებიც იყვნენ და ბიჭებიც. ისინი ბათუმიდან სამტრედიის მიმართულებით მოძრაობდნენ. ხუთივე ადგილზე დაიღუპა, ტრაილერის მძღოლი საავდმყოფოში გადაიყვანეს“, – უყვება „პრაიმტაიმს“ თვითმხილველი.

სასწრაფო სამედიცინო დახმარების ცენტრში აცხადებენ, რომ დახმარების ბრიგადა გამოძახებიდან მალევე მივიდა. თუმცა, მათ ხუთი ადამიანი: ორი მამაკაცი და სამი ქალი ადგილზე გარდაცვლილი დახვდათ.

„ერთმა დაშავებულმა მამაკაცმა ჰოსპიტალიზაციაზე უარი განაცხადა, – განმარტავენ სასწრაფო სამედიცინო ცენტრში.

ადგილზე საპატრულო ეკიპაჟები და სამაშველო სამსახურის წარმომადგენლები არიან მობილიზებულები.

მომხდართან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 276-ე მუხლის მე-8 ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ორი ან მეტი ადამიანის სიცოცხლის მოსპობა გამოიწვია.

წყარო: primetime.ge