ტაბულას ინფორმირებული წყაროების ცნობით, საპატრიარქო ტახტის მოსაყდრემ, მიტროპოლიტმა შიო მუჯირმა პარასკევს წმიდა სინოდის სხდომა მოიწვია.
წყაროთა ცნობით სინოდის სხდომა მართვა-გამგეობის დებულების ზოგიერთი მუხლის განმარტებისთვის მოიწვიეს, რამაც, შესაძლოა, საპატრიარქო არჩევნებიდან გამოთიშოს ორი ძლიერი კანდიდატი.
თუ სინოდი დაადგენს, რომ მართვა-გამგეობის დებულებით, 70 წელზე თუნდაც ერთი დღით მეტი ასაკის პირს არ შეუძლია კენჭი იყაროს პატრიარქად, არჩევნებს გამოეთიშება საჩხერისა და ჭიათურის მიტროპოლიტი დანიელი.
ასევე, თუ სინოდი დაადგენს, რომ საპატრიარქო კანდიდატობისთვის მართვა-გამგეობის დებულება დიპლომს ითხოვს, არჩევნებს ეთიშება ნიქოზისა და ცხინვალის მიტროპოლიტი ისაია.
სინოდი “საორგანიზაციო-პროცედურული საკითხების” გასარკვევად არის მოწვეული და ტაბულას ინფორმაციით მასზე არ გამოირჩევენ 3 საპატრიარქო კანდიდატს.
საქართველოს 142-ე პატრიარქი 17 მაისამდე უნდა ჰყავდეს.
თუ სინოდი მიტროპოლიტ დანიელსა და ისაიას არჩევნებიდან გამოთიშავს, მაღალია ალბათობა, რომ არჩევნებზე დაწინაურდება და ერთმანეთს დაუპირისპირდება ორი კანდიდატი: მიტროპოლიტი შიო და მიტროპოლიტი იობი.