ზურა ჯაფარიძე არ გამორიცხავს, რომ 26 მაისს პატიმრობაში იყოს. როგორ “გირჩის“ ლიდერმა გადაცემა “რეაქციაში“ ჩართვისას განაცხადა, ის ამ წუთსაც გირაოს საფუძველზეა თავისუფლებაზე და ნებისმიერ დროს და ნებისმიერი მიზეზით შეიძლება დააპატიმრონ და უთხრან, რომ გირაოს პირობები დაარღვია.
ოპოზიციონერი პოლიტიკოსი მიიჩნევს, რომ მისი და მისი თანაგუნდელების დაკავებით, პროტესტი მაინც არ გაჩერდება, რადგან პროტესტი ერთ ადამიანზე არ დგას და ბრაზი და პროტესტი საზოგადოებაშია.
არ გამოვრციხავ, შეუძლებელია ასეთი რამეების გამორიცხვა, მარტივი მიზეზის გამო, რომ მე ახლაც, ამ წუთას გირაოთი ვარ გარეთ. ამ წუთშიც, თქვენთან ჩართვის დროს ტროტუარზე ვდგავარ და იცით, რომ ტროტუარზე დგომის გამო, უკვე ადამიანებს ციხეში სვამენ. შეიძლება დამაპატიმრონ და თქვან, რომ მე დავარღვიე გირაოს პირობები, როცა ვიდექი ტროტუარზე და ხელს ვუშლიდი იქ მოსიარულეებს და შემაბრუნონ ციხეში. მაგის გამორიცხვა შეუძლებელია, ნებისმიერი ჩვენგანი, ნებისმიერ დროს, შესაძლოა შეაგდონ ციხეში. მაგის დემონსტრირებას აკეთებენ საჯაროდ, რომ როცა უნდათ და ვისაც უნდათ, დაიჭერენ. რეჟიმი ცალსახად იძახის, რომ ნებისმიერ ადამიანს, როცა გვინდა დავიჭერთ, მაგრამ ეგ არაფერს ნიშნავს. ვიჯექი 7 თვე, მაგრამ ბრძოლა ხომ არ გაჩერებულა. საბოლოოდ, ეს ამბავი და ეს ბრძოლა არ არის ჩამოკიდებული რც ჩემზე, არც ვაშაძეზე , არც გვარამიაზე და არც არავისზე. გასაგებია, რომ პოლიტიკური ლიდერების გარეთ ყოფნა მნიშვნელოვანია, მაგრამ ამ წუთის ამბავი არის ის, რომ პროტესტი და ბრაზი არსებობს ადამიანებში.,- განაცხადა ჯაფარიძემ.
დიდი საპროტესტო შეკრებისთვის ოპოზიციურმა ალიანსმა სამობილიზაციო კამპანია დაიწყო. დღეიდან 9 პარტიის ლიდერები მოქალაქეებს თბილისსა და რეგიონებში პირისპირ შეხვდებიან. გაცხადებული მიზანი პროტესტის გაძლიერება და ამ პროტესტში უფრო მეტი ხალხის ჩართვა.
დიდი შეკრებისთვის 26 მაისი სპეციალურად შეირჩა. ოპოზიციური ალიანსი ამბობს, რომ ის რასაც ქვეყანა ამ დღეს აღნიშნავს, საფრთხეშია და დამოუკიდებლობის დასაცავად ერთიანობაა საჭირო. პირველი მასშტაბური შეკრება სწორედ ამ დღეს რუსთაველზე მოხდება. დაანონსების თარიღიც სიმბოლურია. 35 წლის წინ ამ დღეს ქართველმა ხალხმა დამოუკიდებლობა რეფერენდუმით აირჩია.