რუსეთის პირველი ღია ჩარევა პატრიარქის არჩევნებზე სახეზეა- ექსპერტების შეფასებით, რუსეთის დაზვერვის სამსახურის განცხადებით კარგად ჩანს, რომ ოკუპანტი ქვეყანა პატრიარქის არჩევნებს აკვირდება და იცის, რა ხდება წმინდა სინოდში – ვინ შეიძლება გახდეს კანდიდატი.
სპეციალისტების თქმით, რუსეთის სამიზნე ამ განცხადებაში მსოფლიო პატრიარქი და წმინდა სინოდის ის წევრები არიან, ვინც პროდასავლურად მოიაზრებიან.
რუსეთის საგარეო დაზვერვის განცხადება შეცდომებით სავსეა – დასავლეთ ევროპის მიტროპოლიტი აბრაამი საეკლესიო დებულების თანახმად ამ ეტაპზე კანდიდატი ვერ იქნება, მისი ასაკი დაშვებულ ზღვარს აღემატება. ფოთისა და ხობის მიტროპოლიტი გრიგოლი სატელევიზიო ინტერვიუების დროს საკუთარ კანდიდატურას არ განიხილავს და მეუფე შიოს მხარდამჭერად გვევლინება. მაშინ, რატომ დასჭირდა რუსეთს ამ განცხადების ღიად გავრცელება? – თეოლოგებისთვის ნათელია, რომ ოკუპანტი ქვეყანა მისთვის სასურველ კანდიდატს ლობირებს და ყველა სხვა კანდიდატის დისკრედიტაციას ცდილობს.
საპატრიარქო ეკლესიის მადისკრედირებელ განცხადებას ოფიციალური წერილით არ პასუხობს, თუმცა, პირველებისთვის მოწერილ პასუხში პირდაპირ ამბობენ, რომ პატრიარქის არჩევნებში ჩარევა წარმოუდგენელია და მათთვის გაუგებარია, რას ეყრდნობა რუსეთი.
რატომ ერევა რუსეთის დაზვერვა პატრიარქის არჩევნებში? – ოცნების დეპუტატების ნაწილისთვის რუსული დაზვერვის განცხადება ეკლესიის საქმიანობაში ჩარევა არ არის, სხვებისთვის კი საპარლამენტო არჩევნებსა და პატრიარქის არჩევნებში ჩარევის მცდელობა იდენტურია.