ქართველმა მსახიობმა, გიორგი გურგულიამ „მიქსმეტრონომთან“ ინტერვიუსას ვოლოდიმირ ზელენსკიზე ისაუბრა და პრეზიდენტის მიერ საქართველოზე გაკეთებულ კომენტარებსაც უპასუხა.
მსახიობი თვლის, რომ ქვეყნის პირველი პირი უნდა იყოს პატიოსანი და წესიერი. აქვე ის აღნიშნავს, რომ სხვა პრეზიდენტს შესაძლოა უკრაინა ომამდე სულაც არ მიეყვანა, რაღაც დაეთმო და თავის ხალხს გაფრთხიებოდა.
“ლიდერს პირველ რიგში თავის ხალხი უნდა უყვარდეს. ჩემთვის მაგარი ლიდერი არის ის ვინც ქვეყანას ომს გადაარჩენს. ხალხის ხოცვა არაა სწორი, ომში ყველა წაგებულია, მოგებული მხარე არ არსებობს. როგორც აქეთ კვდებიან ახალგაზრდა ბავშვები და ქალები ისე კვდებიან მეორე მხარესაც.“
ის განმარტავს, რომ ომში 18-19 წლის ახალგაზრები იბრძვიან, რომლებმაც არც კი იცოდნენ სად მიდიოდნენ და ჯარიდან პირდაპირ ომში მოხვდნენ.
„თვითონ კონფლიქტის მიზეზი ვინც არიან, პრეზიდენტები ბუნკერებში ზიან და მაგათ ტყვია არ შეეხებათ, ხალხი იხოცება და ეს არის საშინელება. მე ვფიქრობ უკეთესი ლიდერი რომ ყოლოდა უკრაინას შიძლებოდა აცდენილიყო ომს. ზელენსკის კიდე საქართველო კი არა, უკრაინაც არ უყვარს.“