საფრანგეთში კორონავირუსით ინფიცირებული ყველა პაციენტი განიკურნა. საფრანგეთის ჯანდაცვის მინისტრის, ოლივიე ვერანის განცხადებით, საფრანგეთის ტერიტორიაზე ამ დროისთვის არც ერთი ადამიანი არ არის ინფიცირებული ახალი ტიპის კორონავირუსით და ვირუსი ქვეყანაში აღარ ვრცელდება.
ვერანმა ასევე აღნიშნა, რომ ბოლო პაციენტი, რომელიც ლიონში იყო ჰოსპიტალიზებული, განიკურნა და სახლში დაბრუნდა.
საფრანგეთში სულ 12 ადამიანის ინფიცირება იყო დადასტურებული. მათგან ერთი გარდაიცვალა.
ჩინეთმა ჯანდაცვის მსოფლიო ორგანიზაციას ახალი ტიპის კორონავირუსის გავრცელების შესახებ გასული წლის დეკემბერში აცნობა. ჩინეთში ვირუსს 2 592 ადამიანი ემსხვერპლა, 24 000-ზე მეტი კი განიკურნა.
185 ნახვა
