ჩინეთის მოქალაქეები, რომელთაც დღეს თბილისი ცენტრალში მაღალი ტემპერატურა დაუფიქსირდათ, ინფექციურ საავადმყოფოში გადაიყვანეს. თბილისი ცენტრალში, საათნახევრის განმავლობაში თბილისი-ბათუმის რეისი შეფერხდა.
ამის მიზეზი მატარებელში მყოფი ჩინეთის მოქალაქეები გახდნენ, რომლებსაც მგზავრებმა შეატყვეს, რომ შეუძლოდ იყვნენ. მგზავრების განცხადებით, მათ კორონა ვირუსის შეეშინდათ და ადგილზე სასწრაფო სამედიცინო ბრიგადა გამოიძახეს.
ჩინეთის ორ მოქალაქეს მაღალი სიცხე და ხველება დაუდგინდა, რის გამოც, ექიმები დამატებით გამოკვლევებს ჩაუტარებენ.
თბილისი-ბათუმის რეისის მგზავრები ახალ მატარებელში გადაიყვანეს და საათნახევრის შემდეგ ბათუმში გამგზავრება შეძლეს.
„ჩინეთის მოქალაქეები მატარებლით მგზავრობდნენ. ამ დროს მგზავრებმა შენიშნეს, რომ მათ ჰქონდათ გარკვეული ნიშნები, ერთგვარი გაციებისა, რამაც გამოიწვია ინტერესი. ამის გამო გამოვიძახეთ შესაბამისი სამედიცინო პერსონალი, ხოლო იმისთვის რომ არ შეფერხებულიყვნენ, გამოვყავით ახალი მატარებელი. რეისი შესრულდა, ეს ხალხი მგზავრობს სრულიად უსაფრთხოდ. რაც შეეხება ჩინეთის მოქალაქეებს, მათ დააკვირდებიან“, – განუცხადა ჟურნალისტებს საქართველოს რკინიგზის პრესსამსახურის უფროსმა დაჩი ცაგურიამ.
საქართველომ პრევენციის მიზნით ჩინეთთან პირდაპირი ფრენები შეწყვიტა. ვირუსის ირანში გავრცელების შემდეგ კი, 23 თებერვალს, ამ ქვეყნიდან საქართველოში და პირიქით, ფიზიკური პირების გადაადგილება შეიზღუდა.
ასევე არ გამორიცხავენ მეზობელ ქვეყნებთან სახმელეთო საზღვარზე გადაადგილების შეზღუდვას.
207 ნახვა
