ჭიათურიდან ჩამოსული მაღაროელების თქმით, მათ თბილისში პროკურატურის წინ აქციის გამართვის უფლება არ მისცეს.
როგორც ისინი ამბობენ, მათ გაიარეს კანონით გათვალისწინებული ყველა პროცედურა, იმისათვის რომ აქცია უშუალოდ პროკურატურის წინ ჩატარებულიყო, თუმცა მათ სანაცვლოდ აქციისთვის სხვა ადგილი შესთავაზეს.
მაღაროელები ამბობენ, რომ 4 ჭიათურელი უსამართლოდაა დაკავებული და აქციაზე სწორედ ამის გამო პროტესტის გამოხატვა სურდათ.
„არ გვაძლევენ უფლებას, რომ პროკურატურის წინ, მითითებულ ადგილზე ჩავატაროთ საპროტეტსო აქცია და გვთავაზობენ დაახლოებით 100 მეტრის მოშორებით, სადაც არის ბინათმშენებოლობა და ხმაურია, ფაქტობრივად აზრიც კი ეკარგება იქ საპროტესტო აქციის ჩატარებას. ჩვენ ვწყვეტთ საპროტესტო აქციას და ვუცხადებთ უნდობლობას იმ ახლად მიღებულ კანონს, რომლის საფუძველზეც უნდა დაიცვა წესები, 5 დღით ადრე მიმართო, უნდა მოგცეს ნებართვა რა ლოკაციაზე [ჩაატარებ აქციას] , თითქოს მშვიდობიანად და უწყინარი კანონი მიიღეს შეკრების და მანიფესტაციის შესახებ, მაგრამ იმდენად გაამკაცრეს, ფაქტობრივად, საპროტესტო აქცია სადაც საჭიროა, რომ ჩაატარო, ამის ნაცვლად გთავაზობენ ისეთ ადგილს საიდანაც საპროტესტო აქციის ჩატარებას აზრიც არ ექნება, ჩვენ ვბრუნდებით ისევ ჭიათურაში…“- განაცხადა მაღაროელმა.
ცნობისთვის, ჭიათურაში მაღაროებთან მიმდინარე აქციების მონაწილე მაღაროელებს 20 იანვარს 4 და 6 წლით პატიმრობა მიუსაჯეს.
ფოტო: პუბლიკა