სოციალურ ქსელში ვრცელდება ვიდეო, სადაც ჩანს, როგორ ჩაედინება ფოთის ზღვაში, დაუდგენელი ნივთიერება – ვიდეოს “ჩემი ქალაქი მკლავს” ავრცელებს.
“ფოთი – შავ ზღვაში ჩაედინება !!!
მკ*%*რი დელფინიც ჩანს ვიდეოში !!
სანახავია და კვლევაა ჩასატარებელი ამ ადგილას, თუ რა ჩაედინება შავ ზღვაში !!!” – წერია გვერდზე.
“ტვ პირველის” ინფორმაციით, აღნიშნული მასა სავარაუდოდ თევზის გადამამუშავებელი ქარხნის ტერიტორიიდან მოდის და, წინასწარი ინფორმაციით, ეს არის თევზის დამუშავების პროცესში გამოყენებული წყალი, რაც საწარმო შპს “შავი აკვაკულტურების კომპანიას” ეკუთვნის.
“ტვ პირველთან” საუბარში, ერთ-ერთი წყარო აცხადებს, აღნიშნული პრობლემა უკვე წლებია არსებობს. მისი თქმით, ქარხნიდან გამავალი მილები პირდაპირ ზღვას უკავშირდება, რის შედეგადაც გამოყენებული წყალი ყოველგვარი დამუშავების გარეშე ჩაედინება შავ ზღვაში. ამ ტერიტორიაზე კი მოქალაქეებისთვის ცურვა აკრძალულია.
აღნიშნულთან დაკავშირებით ფოთის მერიის ეკოლოგიურ სამსახურს მივმართეთ, თუმცა უწყებაში კითხვებს არ პასუხობენ.
“მაგაზე კომენტარი გაკეთებულია და გაშუქდა, მიმართეთ მერიის პრესცენტრს. მე ვერაფერს მოგახსენებთ,” – განაცხადა მიშა სარიშვილმა, ფოთის მერიის ეკოლოგიის სამსახურის თანამშრომელმა.
გარემოს დაცვის ზედამხედველობის სამსახურს კი ამ საკითხზე რეაგირება ამ დრომდე არ მოუხდენია.