საქართველო ევროკავშირში თავშესაფრის მაძიებელთა რაოდენობით მსოფლიოს წამყვან 20-ეულშია – EUAA-ს 2025 წლის ანგარიშისაქართველო ევროკავშირში თავშესაფრის მაძიებელთა რაოდენობით მსოფლიოს წამყვან 20-ეულშია – EUAA-ს 2025 წლის ანგარიში
საქართველო ევროკავშირში თავშესაფრის მაძიებელთა რაოდენობით ქვეყნების წამყვან 20-ეულშია. ამის შესახებ ევროკავშირის თავშესაფრის სააგენტოს (EUAA) 2025 წლის ანგარიშში წერია, რომელიც მის ვებგვერდზე ვრცელდება.
ქვეყანა სიაში მე-17 ადგილზეა და ამ განაცხადების რაოდენობით ჰაიტის (მე-18 ადგილი), გვინეასა (მე-19) და ერაყს (მე-20) უსწრებს, ხოლო ერთი პოზიციით წინ მყოფ ერიტრეას, თითქმის, უტოლდება.
2025 წელს ევროპაში თავშესაფარი საქართველოს 15 ათასზე მეტმა მოქალაქემ მოითხოვა
კერძოდ, 2025 წელს EUAA-მ საქართველოდან თავშესაფრის მოთხოვნის შესახებ 15 295 განაცხადი დაარეგისტრირა. აქედან პირველადი განაცხადი 12 788 იყო, ხოლო გადაწყვეტილება 12 408 განაცხადზე იქნა გამოტანილი. სტატუსის მინიჭების საერთო დადებითი მაჩვენებელი 0.05%-ს, ხოლო უარყოფითი 0.95%-ს შეადგენს. 11 577 განაცხადი განხილვის პროცესში იყო, ხოლო 1 026 უკან იქნა გატანილი.
ევროკავშირის ტოპ 3 ქვეყანა, სადაც ქართველები თავშესაფარს ითხოვდნენ, საფრანგეთი, იტალია და გერმანიაა.
პირველ ინსტანციაში აღიარების, ანუ სტატუსის მინიჭების მაჩვენებელმა საფრანგეთში 6%, იტალიაში 4%, გერმანიაში კი 0% შეადგინა. რაც შეეხება ევროკავშირის სხვა ქვეყნებს, ანალოგიური 0%-იანი აღიარების მაჩვენებელია საბერძნეთში, ნიდერლანდებში 3%, ავსტრიაში – 7%, ირლანდიაში – 9%, ესპანეთში – 12%, ხოლო ბელგიაში 23%-ია. პირველი ინსტანციის გადაწყვეტილებები მოიცავს ყველა პირს, რომელსაც ევროკავშირის მიერ რეგულირებული საერთაშორისო დაცვის (ლტოლვილის ან დამატებითი დაცვის) სტატუსი მიენიჭა. საერთაშორისო დაცვის შესახებ გადაწყვეტილებას პირველი ინსტანცია პროცედურის ფარგლებში პირველი ან განმეორებითი განაცხადის შემდეგ იღებს.