საქართველოს კათოლიკოს-პატრიარქის გარდაცვალებას The New York Times ვრცელ სტატიას უძღვნის და ილია მეორეს ქვეყნის ისტორიაში “სტაბილურობის სულიერ სიმბოლოს” უწოდებს.
სტატიაში ნათქვამია, რომ პატრიარქი თითქმის ნახევარი საუკუნის განმავლობაში ედგა სათავეში საქართველოს ეკლესიას და ქვეყნის ეროვნული იდენტობის მთავარ საყრდენად აქცია.
“საქართველოს მართლმადიდებელი ეკლესიის ისტორიაში ყველაზე ხანგრძლივი ვადით მოღვაწე წინამძღოლი ქვეყანას საბჭოთა რეპრესიებიდან თანამედროვე სახელმწიფოებრიობამდე ტრანზიციის პერიოდში გზის გაკვალვაში დაეხმარა. საეკლესიო მოღვაწეობის პარალელურად, პატრიარქი კომპოზიტორი და მხატვარი იყო.
როგორც მსოფლიოს ერთ-ერთი უძველესი ქრისტიანული ინსტიტუტის – საქართველოს მართლმადიდებელი ეკლესიის – ისტორიაში ყველაზე ხანგრძლივი ვადით მოღვაწე პატრიარქმა, ილია II-მ ეკლესია ქვეყნის ყველაზე მდგრად და პატივსაცემ ინსტიტუციად აქცია.
საქართველო ამაყობს იმით, რომ ქრისტიანობა სახელმწიფო რელიგიად ერთ-ერთმა პირველმა აღიარა, მისი მოსახლეობა კი დღემდე ღრმად მორწმუნედ რჩება. მაშინ, როდესაც ილია II ეკლესიის წინამძღოლი გახდა, საპატრიარქო მხოლოდ რამდენიმე ათეულ მოქმედ სამრევლოსა და მცირე რაოდენობის მონასტერს აერთიანებდა. მისი ხელმძღვანელობით ეკლესია მნიშვნელოვნად გაფართოვდა, მანვე იღვაწა ეკლესიის დამოუკიდებლობის საერთაშორისო აღიარების მოსაპოვებლად. დღეს საქართველოს მართლმადიდებელ ეკლესიას ათასზე მეტი სამრევლო აქვს,” – წერს The New York Times.