აშშ-ის სპეცწარმომადგენლის, ჯონ კოულის ლუკაშენკოსთან მოლაპარაკებებისა და ზოგიერთი სანქციის მოხსნის შემდეგ, ბელარუსში 250 პოლიტპატიმარი გაათავისუფლეს. ამის შესახებ ინფორმაციას ბელარუსიდან დამოუკიდებელი მედიასაშუალება Belsat-ი ავრცელებს.
გამოცემის ცნობით, გათავისუფლებულებიდან 235-ს ბელარუსში დარჩენის უფლება მისცეს, ხოლო 15 იძულებით იქნა დეპორტირებული ლიეტუვაში.
გათავისუფლებულთა შორისაა Belsat-ის ჟურნალისტი კატერინა ანდრეევა. ის 2020 წლის 15 ნოემბერს, მინსკში დააკავეს, როდესაც რომან ბონდარენკოს ხსოვნისადმი მიძღვნილ მსვლელობაზე ცვლილებების მოედნიდან პირდაპირ ეთერში გადადიოდნენ.
მოგვიანებით 2021 წლის 18 თებერვალს, ჟურნალისტ ქალს ორი წლით თავისუფლების აღკვეთა მიესაჯა სისხლის სამართლის კოდექსის 342-ე მუხლით “საზოგადოებრივი წესრიგის უხეში დარღვევის ქმედებების ორგანიზებისა და მომზადებისთვის”.
მოგვიანებით მასზე ახალი სისხლის სამართლის საქმე აღიძრა 356-ე მუხლით “სახელმწიფოს ღალატისთვის”. 2022 წლის 13 ივლისს ანდრეევას 8 წლითა და 3 თვით თავისუფლების აღკვეთა მიესაჯა.