“დუკა”, “კალავერა”, “ბაგირა” და კიდევ 25 პირი განსასჯელის სკამზე – თბილისის საქალაქო სასამართლოში “ქურდულ სამყაროსთან“ კავშირის ბრალდებით დაკავებულების პროცესი მიმდინარეობს.
დაკავებულებს “ქურდული სამყაროს” წევრობას ედავებიან. 28 პირს შორის, რომელთა აღკვეთის ღონისძიებაზე ამ წუთებში სასამართლო მსჯელობს, არიან ძმები წულუკიძეები და ქალი, რომელსაც გამოძება ქურდულ სამყაროსა და მოქალაქეებს შორის შუამავლობას ედავება. გამოძიების ინფორმაციით, ქალი არაერთხელ არის მხილებული “ქურდული სამყაროს” წევრებისადმი მიმართვაში.
დაკავებულები წაყენებულ ბრალს არ აღიარებენ. ცოტა ხნის წინ სასამართლო დარბაზში დუმილი დაარღვია ძმები წულუკიძეებიდან ერთ-ერთმა და თქვა რომ მათ წინააღმდეგ საქმე გამოგონილია.
შინაგან საქმეთა სამინისტროს მიერ გავრცელებული ფარული ჩანაწერებიდან დგინდება, რომ მილიონიანი საქმეები “კრიმინალური ავტორიტეტ” ასლან ქობულაძესთან იგივე “ბაბუსთან” წაიღეს. საუბარია 450 000 დოლარიან დავაზე (დაახლოებით 1 220 000 ლარი). ფარულ ვიდეოჩანაწერში ისმის გინება, ასევე ფიზიკური ანგარიშსწორებითა და სიცოცხლის მოსპობით მუქარა.
პასუხისგებაში მისცეს „კანონიერი ქურდი“ ასლან ქობულაძე და მისი ძმაც, მეტსახელად „დუკა“.
დაკავებულთა შორის არიან ძმები წულუკიძეები. ხელვაჩაურში ჩატარებული სპეცოპერაციის დროს, ერთ-ერთი ბრალდებულის დაკავებისას მისი დედა, 75 წლის ქალი დაშავდა. თამარ მიქელაძის შვილის მტკიცებით, დედამ უთხრა, რომ ძალოვანი უწყების წარმომადგენელმა ესროლა.
შსს-ს მტკიცებით, დაკავებულები ე.წ. ქურდული გარჩევებისა და შეკრებების დროს, უკავშირდებოდნენ “ქურდული სამყაროს” წარმომადგენლებს, მათ შორის „კანონიერ ქურდს“, ასლან ქობულაძეს და პირადი სარგებლის მიღების მიზნით, ე.წ. ქურდული წესების შესაბამისად, მოქალაქეებს შორის არსებული ფინანსური და სხვა კრიმინალური სახის დავებზე იღებდნენ გადაწყვეტილებებს, რის შემდეგაც მხარეებს თანხის გადახდას აკისრებდნენ. კონკრეტული ვადების დარღვევის შემთხვევაში კი, ფიზიკური ანგარიშსწორებითა და სიცოცხლის მოსპობით ემუქრებოდნენ.