“ქართულმა ოცნებამ” რაჭაში “სორგითი 1” და “სორგითი 2” ჰესის მშენებლობისთვის ინვესტორს მიწები 49 წლით გადასცა – ინფორმაციას ამის შესახებ BMG ავრცელებს და წერს, რომ ონის მუნიციპალიტეტის 8 სოფელში არასასოფლო მიწის ნაკვეთები კომპანია „განახლებადი ენერგიის რეგიონალურ კომპანიას“ 49 წლით, აღნაგობის უფლებით გადაეცა.
ირაკლი კობახიძის 533-ე და 534-ე განკარგულების მიხედვით, ინვესტორმა ყოველწლიურად, ჯამში 73 245 მ²-ის მიწით სარგებლობის საფასური 81 470 ლარი უნდა გადაიხადოს და ქონება “სორგითი 1” და “სორგითი 2” ჰესების ასაშენებლად და ექსპლუატაციისთვის უნდა გამოიყენოს. მიწის ნაკვეთები სოფელ ონჭევში, პიპილეთში, წოლაში, ქვედრულაში, სორგითში, ირიში, ბაჯიხევში და წედისში მდებარეობს.
დოკუმენტის მიხედვით “ქართულ ოცნებასა” და ინვესტორს [განახლებადი ენერგიის რეგიონალურ კომპანიას] შორის ხელშეკრულება 2026 წლის 29 იანვარს გაფორმდა. გამოცემა წერს, რომ სამეწარმეო ამონაწერის თანახმად, შპს განახლებადი ენერგიის რეგიონალური კომპანია 2022 წელს არის რეგისტრირებული და მისი დირექტორი დავით უგრელიძეა. 90%-ს სააქციო საზოგადოება რაჭა გრინ ენერჯი [დირექტორი დავით უგრელიძე], 10%-ს კი მაკა საბანაძე ფლობს.