ისრაელის თავდაცვის ძალებმა ირანის კრიტიკულ ენერგეტიკულ ინფრასტრუქტურას დაარტყეს, მათ შორის ობიექტებს, რომლებიც დაკავშირებულია სამხრეთ პარსის ბუნებრივი აირის საბადოსთან და ბუშირის პროვინციაში მდებარე ასალუიეს გადამამუშავებელ ჰაბთან.
პარალელურად, “ცაჰალისა” და “პენტაგონის” ერთობლივი ოპერაციის ფარგლებში, იერიშები განხორციელდა ირანის შიდა უსაფრთხოების ობიექტებზე, კერძოდ ისლამური რევოლუციის გუშაგთა კორპუსის, “ბასიჯისა” და სამართალდამცავი ორგანოების ცენტრებზე თეირანში, ალბორზსა და ლორესტანში.
“ვოლ სტრიტ ჯურნალი” წერს, რომ ომში ისრაელმა და აშშ-მა ირანში პასუხისმგებლობის ზონები გაინაწილეს. ამერიკელი სამხედროები იარაღის მწარმოებელ და სამრეწველო ობიექტებზე არიან ფოკუსირებულები, ხოლო ისრაელის ძალები რეჟიმის შიდა სტრუქტურებზე.
ცნობილია ისიც, რომ პენტაგონმა თეთრ სახლს მოსთხოვა, მიმართოს კონგრესს და ირანთან მიმდინარე სამხედრო კამპანიისთვის 200 მილიარდი დოლარის ოდენობის დაფინანსება მოითხოვოს, ინფორმაცია “ვაშინგტონ პოსტმა” წყაროებზე დაყრდნობით გაავრცელა.
დარტყმებს ახორციელებს ირანიც. “სამხრეთ პარსზე” იერიშის საპასუხოდ, ისლამური რევოლუციის გუშაგთა კორპუსი სპარსეთის ყურის ქვეყნების ნავთობისა და გაზის ობიექტებზე თავდასხმით იმუქრება. სტრუქტურამ დაასახელა კონკრეტული სამიზნეები საუდის არაბეთში, არაბთა გაერთიანებულ საამიროებსა და კატარში.
კატარში, რას-ლაფანის სამრეწველო ზონაში მდებარე მსოფლიოს ერთ-ერთი უმსხვილესი ნავთობგაზის კომპლექსი ბალისტიკური რაკეტების სამიზნე გახდა. ობიექტზე 12 საათის განმავლობაში ორი შეტევა განხორციელდა. კატარის საგარეო საქმეთა სამინისტრომ მომხდარს “ირანის სასტიკი თავდასხმა” და “ეროვნული უსაფრთხოების პირდაპირი საფრთხე” უწოდა.
თავდასხმის სამიზნე გახდა ისრაელიც. ქვეყნის ცენტრალურ ნაწილში, მოშავა ირანული სარაკეტო თავდასხმის შედეგად 1 ადამიანი დაიღუპა.