ათონელის სასახლესთან, 4 ოქტომბერს განვითარებულ მოვლენებთან დაკავშირებით დაკავებულები, მათ შორის, ნანა სანდერი და კიდევ 10 პირი კვლავ პატიმრობაში რჩება.
აღნიშნული გადაწყვეტილება თბილისის საქალაქო სასამართლოს მოსამართლემ თამარ მჭედლიშვილმა მიიღო.
დღევანდელ სხდომაზე პროკურატურის რამდენიმე მოწმე დაიკითხა, ამასთან დაკავებული პირების მიმართ შეფარდებული აღკვეთის ღონისძიება პატიმრობა გადაისინჯა და ის ძალაში დარჩა.
პროკურატურის პოზიციით, არსებითად ახალი გარემოება, რაც შეფარდებულ აღკვეთის ღონისძიებას შეცვლიდა, არ გამოკვეთილა, რის გამოც, ისინი კვლავ პატიმრობაში უნდა დარჩენილიყვნენ.
შუამდგომლობას დაცვის მხარე არ დაეთანხმა. ისინი მკაცრი აღკვეთის ღონისძიების პატიმრობის ნაკლებად მკაცრი ღონისძიებით შეცვლას ითხოვდნენ.
ნანა სანდერის ადვოკატი მისი დაცვის ქვეშ მყოფის ჯანმრთელობის მდგომარეობაზეც და მის მიმართ განხორციელებულ ქმედებებთან დაკავშირებითაც საუბრობდა.
აღკვეთის ღონისძიება ბრალდებულებიდან მხოლოდ მარიამ მეყანწიშვილთან არ გადასინჯულა, რადგან ის გირაოს სანაცვლოდ თავისუფლებაზე იმყოფება.
ცნობისთვის, ათონელის სასახლესთან, 4 ოქტომბერს განვითარებულ მოვლენებთან დაკავშირებით ბექა ქელეხსაშვილს, მამუკა ლაბუჩიძეს, გურიელა ქარდავას, ვახტანგ ფიცხელაურს, ალესანდრე ხაბეიშვილს, აბო ნავერიანს, ანტონ უპერს, ავთანდილ სურმანიძეს, გიორგი მულაძეს და თემურ ქურციკიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.
მარიამ მეყანწიშვილს ბრალდება სსსკ-ის 226-ე მუხლით აქვს წარდგენილი, რაც ჯგუფური მოქმედების ორგანიზებას გულისხმობს.
ნანა სანდერს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს და სასჯელის ზომად 6-დან 9- წლამდე თავისუფლების აღკვეთას ითვალისწინებს. მას ბრალდება ასევე წარდგენილი აქვს სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9- წლამდე თავისუფლების აღკვეთას ითვალისწინებს.