მიხეილ სარჯველაძემ პატრიარქის ჯანმრთელობის მდგომარეობასთან დაკავშირებით კომენტარი ჟურნალისტებთან გააკეთა.
მინისტრის თქმით, პატრიარქის მდგომარეობის გათვალისწინებით, ამ ეტაპზე, უცხოეთში სამკურნალოდ გადაყვანის საკითხი არ განიხილება.
“უცხოეთში წაყვანის საკითხი ამ წუთას არ განიხილება, არსებული მდგომარეობის გათვალისწინებით. რაც შეეხება უცხოელი ექიმის ჩამოყვანას, რა წამსაც ამის საჭიროება დადგება, უზრუნველყოფილი იქნება. უკლებლივ ყველაფერი, რაც აუცილებელია, გაკეთდება. ჩვენ ვმსჯელობთ იმასთან დაკავშირებით, რით შეიძლება უწმინდესის მდგომარეობა გაუმჯობესდეს,” – აცხადებს მიხეილ სარჯველაძე.
მისი ინფორმაციით, ილია მეორეს მკურნალობის პროცესში ჩართული არიან წამყვანი სამედიცინო დაწესებულებების რეანიმაციული განყოფილებების ხელმძღვანელები და რეანიმატოლოგები.
“ჩვენ ვცდილობთ, რომ გარდა სტანდარტული კლასიკური მეთოდოლოგიისა, მაქსიმალურად თავი მოვუყაროთ ყველა მოსაზრებას, ყველა კომპეტენტურ აზრს, რომელიც შეიძლება ამ საკითხის ირგვლივ აღმოჩნდეს შედეგზე ორიენტირებული, იქნებ არსებობდეს რაიმე შემოთავაზება, რომელსაც შეუძლია გააუმჯობესოს გარკვეული პროცედურები. ეს არის ჩვენი მცდელობის მიზანი. აქ არიან წამყვანი სამედიცინო დაწესებულებების რეანიმაციული განყოფილებების ხელმძღვანელები, რეანიმატოლოგები, შესაბამისად, მათთვის კონსულტაციების გავლა არის ერთ-ერთი მთავარი რეკომენდაცია,” – განაცხადა მიხეილ სარჯველაძემ.